Motuhop unta kanato ang kaayo ni Cardinal Vidal

SUAREZ

Medyo nagkasumpaki ang figure sa gidaghanon sa mga misaksi sa makasaysayanon nga lubong ni Cebu Archbishop Emeritus Ricardo Cardinal Vidal niadtong Huwebes sa buntag October 26, 2017.

Ang kapolisan mibana-bana nga moabot lang sa 55 mil ka mga tawo samtang si Santo Niño Barangay Captain Pancho Ramirez nga daklit nakong na-estorya mi-estimate nga moabot sa tunga sa milyon ka mga tawo.

Sa akong kabahin nga mitambong sab sa funeral Mass uban sa akong mga miembro sa pamilya, makaingon g’yud nga puwerte gyu’ng daghana ang misud-ong ni Cardinal Vidal.

Bisan niadtong Miyerkules sa gabii nga maoy katapusan sa iyang lamay ug public viewing puwerteng bagaa sa mga tawo ang naglinya sa gawas aron lang g’yud pagyukbo kaniya.

Pagkanindot sa linya sa mensahe ni Cardinal Vidal nga gipaabot ngadto kang Bishop Dennis Villarojo nga likayan g’yud ang pagpangaway kay ang tawo nga imong awayon maoy makatabang kanimo.

Kung itisok sa kasingkasing sa tanan kining maong mensahe pagkanindot puy-an ang kalibutan nga puno sa panagdait ug gugma.

* * *

Nahimong celebrity sa makadyot sa mga Sugbuanon si Manong Juanito Vidal, igsoon ni Cardinal Vidal human sa lubong niadtong Huwebes sa udto.

Dihang mibiya na sa gilubngan ni Cardinal Vidal si Manong Juanito, daghan ang misugat kaniya ug nangamen sa iyang tuong kamot.

Mipadayag g’yud sa ilang dakung kalipay si Manong Juanito ug si Karen Vidal Rafanan nga pag-umangkon, sa gipakita natong gugma ngadto ni Cardinal Vidal.

* * *

Paeta g’yud ning ubang mga tawo nga maayo kaayong mosakay sa panahon.

Atol sa solemn nga funeral Mass ni Cardinal Vidal, dihay usa ka himsog nga inahan nga nagdala sa iyang anak nga nanglimos sa mga nanimba.
Wa gyu’y nanghatag kaniya sa among nahimutangan sa dalan Legaspi duol sa barangay hall sa Sto. Niño kay dili g’yud deserving.

Apan pagkahuman sa lubong, amo siyang gikasugat sa may Osmeña Boulevard nga nag-yaw-yaw na ug mibalikas sa iyang anak kay nangayo og mainom.

Dihang dunay nakabantay kanila ug mikomentaryo nga sila maoy nanglimos sa nanglabay’ng mga oras, ang iyang bana nga may patik maoy nangisog sa mga nadunggan nga mga komentaryo.

Pagkabantay sa magtiayon nga dihay patrol car nga nagpa-ingon, mikaratel pagsibat.

Akong nabantayan nga ning nagkaduol na nga Pasko medyo nagkadaghan na g’yud ang mga manglimusay sa kadalanan.
Gawas sa mga manglimos, anaa sab ang mga psychotic vagrant.

Asa man ang atong mga naglangkub sa Anti -Mendicancy Task Force? Nagtug-tug sa pansitan?

* * *

Aron segurado nga dili kita mabiktima sa mga kawatan niining pag-obserbar sa Kalag-Kalag, kinahanglan g’yud nga dili maghurot pag-biyahe ug may ibilin sa mga panimay.

Sa mga mobiyahe ug moadto sa mga sementeryo kinahanglang magdala lang sa insaktong kantidad ug di g’yud magsul-ob sa mga alahas ingon man pagdala sa mga mahalon nga gadgets.

Paglikay sa disgrasya sa tanang matang sa transportasyon, kinahanglang wa gyu’y overloading unya sa mga mo-drive dapat kondisyon ang lawas. Dili hubog.

Importante sab kaayo nga kondisyon atong mga sakyanan.

I-check ang B-L-O-W-B-A-G kon brake, light, oil, water, battery, air and gasoline.

Happy Halloween!