SUAREZ
Dunay surambaw sa ipatuman nga discipline zone sa Cebu City government sugod karong adlawa kay ang mga gagmay’ng vendors lang maoy madaugdaug ning mangtas nga panggobyerno.
Nakaingon ko nga may surambaw kay niadtong Biyernes sa hapon gitug-anan mi ni Citom Supervisor Efren Navales nga ang discipline zone magsubay sa Osmeña Boulevard gikan sa Provincial Capitol paingon sa dalan Colon.
Matud ni Navales, mao kini ang resulta sa ilang briefing uban kang Cebu City police Director Joel Doria ug sa taga Probe team pinanguluhan ni Raquel Arce nga limpiyohan ang kalsada ug palayason ang mga naninda.
Apan niadtong Sabado, gi-usab nila ang plano ug ipatuman kini pinaagi sa phase 1 to phase 3. Ang phase 1 gikan sa Capitol ug kutob nalang diha sa may dalan RR Landon human sa Police Regional Office 7.
Buot ipasabot nga kung diha ra kutob sa may RR Landon ang discipline zone, padayon ang negosyo sa mga dagkung negosyante nga maka-afford og dagku’ng abang sa Sinulog Foundation diha sa sidewalk sa Abellana National School ug Cebu City Central School.
Padayon usab ang mga abusadong Muslim-Maranao nga mi-okopar sa sidewalk habig sa University of Cebu, Unitop ug sa mga sikbit nga mga business establishments.
Prangka lang, wa gyud ko makasabot nganong unahon paghawan sa mga vendors gikan sa Kapitolyo paingon sa RR Landon nga unta lapad pa man ang sidewalk ikomparar diha sa Colon area?
Kung ipatuman ang discipline zone nganong dili naman lang i-implimentar sa tanang kalsada aron may kaangayan unya pangitaan sa gobyerno og insaktong lugar nga makapadayon ang mga vendors sa ilang panginabuhi?
* * *
Ambot kung pilay gidawat nila’ng Jimmy Largo ug Jordan Gera gikan sa mastermind pagbanhig-patay ni Ermita Barangay Captain Felicisimo “Imok” Rupinta kay hangtud karon mga denial king man gihapon bisag nakuhaan ang mga kanahan og footage sa CCTV camera sa usa ka convenience store sa Liloan.
Gipasaligan sila sa mastermind nga makalingkawas ra gihapon sa kaso kay ila ang gobyerno?
Kung akoy Largo, modiga na lang kung kinsay nagsugo kanila.
Kadtong unang sugilanon ni Largo nga dunay misugo kaniya nga ipapatay si Kapitan Rupinta butang kini nga angay’ng subayon sa kapulisan.
Daku kog pagtoo nga anaa ra diha sa Ermita ang mastermind kay daku’ng babag si Imok sa ilang ambisyon sa pulitika.
* * *
Niadtong mga 1994 o 1995 nga maoy pagsugod nako’g cover sa Cebu City Palace of Justice, usa sa daku’ng problema sa mga huwes ug mga court personnel mao nga pirmi silang mahutdan sa mga office supplies sama sa bond paper, yellow paper, ribbon sa type writer ug uban pa.
Diskarte sa mga huwes ug mga personnel mao nga mokuot na lang gyud sa kaugalingong bulsa aron makapalit.
Samtang naglakaw ang katuigan, nagbalik-balik kining maong problema ug ang pirming tubag ni Atty. Jeoffrey Joaquino mao nga wa gyud siya’y mahimo tungod kay centralized ang tanan didto sa Korte Suprema.
Hangtud nga gitukod ang Regional Court Administrator’s Office (RCAO) aron masulbad ang mga problema.
Apan giwagtang og kalit kay dihay nag-ilog sa puwesto sa RCAO ug dihay mga nanggawas nga negatibong mga isyu.
With all due respect, wa ko’y nakitang dautan sa tumong ni Supreme Court Chief Justice Maria Lourdes Sereno dihang gibalik niya ang creation sa RCAO bisan way approval sa iyang mga kauban nga mga mahistrado.
Tanan nalang gyu’ng programa bisan maka-ayo sa day-to-day court operations ipananghid pa ni Sereno sa iyang mga kauban nga nasuya sa iyang appointment?