SUAREZ
Samtang dunay mga taxi driver nga hilabihang pagkabadlungon kay manulis ug manglubag, apan dunay usa ka taxi driver sa Pangging taxi nga certified gyud nga super ka buotan ug tarong nga nanerbisyo.
Nahurot akong bilib, ug saludo gyud ko niya.
Siya mao si Feliciano Campanilla Labolabo Jr., lumad nga taga Aloguinsan nga wa gyud masilaw sa mga butang nga mahalon nga nahibilin sa iyang unit.
Pipila na ka tuig ang nakalabay, una niya’ng giuli sa akong programa’ng “Lloyd Suarez On Board Saksi” sa DYSS Super Radyo ma-o ang mga pinutos nga grocery items ug nakuha gyud sa tag-iya.
Sa hinapos nga bahin sa Disyembre sa miaging tuig, gitugyan usab niya kanako ang I-phone 4 “Apple” ug milampos sab ko sa pag-uli ngadto sa tag-iya nga taga Cagayan.
Samtang niadtong miaging simana, mi-turned-over usab siya og laing “Apple” cellular phone nga I-Phone 6 ug dali sa’ng nakuha sa iyang pasahero.
Pagkanindot sa mensahe nga gipaambit ni Labolabo kanato.
Maayo unta nga manakod kini. Butang nga dili ato, kinahanglang i-uli sa tinuud nga tag-iya.
* * *
Maayo seguro’ng i-qualify ug klarohon ni Cebu City Mayor Tomas Osmeña ang iyang kamanduan nga liquor ban ug pangdakpon ang mo-inom ug kadtong hubog atul sa Sinulog grand parade.
With all due respect, daghan pang responsable nga moinom nga ang tuyo mao ra gyud ang paglingaw-lingaw kay fiesta lagi. Way lami ang fiesta kung di ta hubog. Hehehehe.
Unsa to iyang plano nga ultimo ang mga restaurant o resto bar did-an sa pagbaligya’g ilimnong makahubog? Buot ipasabot nga kadtong mga tawo nga anaa sa mga private establishments nga nagtago-tago pag-inom iyang ipa-pick-up?
Kanang mga mukuyog sa parade nga mosakay sa float nga mag-bitbit og beverages nga makahubog sama sa mga artista ug mga foreigner, apilon pagdakop? Exempted sila kay bisita? Kung mao way kaangayan.
Pananglitan karon kung may gatusan ka tawo mag-inom aron hagiton si Osmeña mahurot nila’g dapog ug masud sa ilang detention facility?
Kung akoy pulis di nalang ko magpa-alig-alig sa pagpanakop sa mga hubog. Adto nalang mo-focus sa mga terorista nga maoy maghatag og daku’ng hulga kanato.
Dili hulga ang mga hubog kay way kusog.
* * *
Dunay usa ka opisyal sa Kapitolyo sa Accounting Department nga si Mr. Henry Resentes ang mipadangat og reklamo bahin sa dili maayong tratamento kaniya sa guwardiya ug sa nurse sa Mandaue City District Hospital.
Nahitabo kini niadtong miaging Nobyembre 30 sa gabii. Sumaa sa iyang suwat-reklamo nga buot unta niyang mapa-check-up ang ilang anak nga puwerte’ng uboha.
Gibalibaran sila kay wa nay OPD or Out-Patient Department. Giingnan siya nga pabalikon pagka ugma kay dili emergency ang sitwasyon sa iyang anak.
Apan dihang mi-esplikar sila nga ipa-check-up lang sa nakaduty nga doctor aron ma-resitahan og tambal o ba kaha mahatagan og antibiotic ngan pulos sila manarbaho inig ka buntag giingnan sila nga ipa-admit nalang ilang anak.
Butang nga nahimo nilang lalis.
May ponto baya si Mr. Resentes sa iyang reklamo kay niadtong higayuna way gi-atiman nga pasyente ang emergency room.
Alang gud nako pila raman gud unta na’ng pag-atiman sa bata nga puwerte’ng uboha ug paghatag og resita.
Mao ni ang klaseng panerbisyo sa taga ospital sa gobyerno? Maayo ni’ng susihon ni Mayor Luigi Quisumbing aron matunhay ang mga palisiya diha.