Gerard Pareja
Nyor Gamay (NG): Duna bay mga alien, Nyor.
Nyor Daku (ND): Illegal alien? TNT?
NG: Dili Nyor. Kana bang taga outer space.
ND: Wa pa man koy nasugatan, Nyor.
NG: Pero dunay posibilidad nga tinuod ni sila?
ND: Ambot, Nyor.
NG: Sa ato pa, to see is to believe diay ka?
ND: Ang problema kay kon naa man gali na sila di na sila magpakita nato.
NG: Ngano man Nyor?
ND: Di na sila ganahan nato.
NG: Ha?
ND: Ikaw ganahan makig dulog ug unggoy?
NG: Unsay labot?
ND: Matud pas mga scientist, gamay ra kaayog ligas ang DNA sa tao ug sa unggoy nga mura ra nato silag igsuon. Apan naka kita ba kag unggoy nga ni drive og auto, nanudlay, nakahimog cell phone, naka program og apps, nakalutog balbacua, nikantag happy birthday, nisayaw og Gangnam style?
NG: Unya?
ND: Kon ingnun ta lang punga nga ang labaw nato sa ungoy mao say labaw sa mga alien nato. Basig kining gitawag nimog alien dina manginahanglag cell phone para mo communicate. Ug basig advance na kaayo ilang telepathy nga nonverbal na ilang lalis. Wa na sila manginahanglag chopper para motabok og pito ka bungtod. Nganong makig himamat pa man sila nato nga para kanila mura ra man tag ungoy nga way ikog.
NG: Faet!
ND: Kon naa man gani alien Nyor, dugay na ta nilang gitangkal. Basig wa lang ta kahibawo nga natangkal na diay ta.
NG: Taya gud ana Nyor. Unya unsa man sad ning flat earth theory?
ND: Murag di pa ma champion ang Boston Celtics rong tuiga.
NG: Ha. Layua gud anang imong tubag.
ND: Si Kyrie Irving, nga point guard sa Celtics karon, apil sa mga celebrities nga mi intra ning maong inamaw nga palakaw nga flat ang kalibutan.
NG: Inamaw diay ni Nyor?
ND: Garbo, Nyor. Pride. Dili fried rice ha o fried chicken.
NG: Pasabta kuno ko Nyor.
ND: Ang tao Nyor, ganahan gyud manghambog. Ganahan sila nga sa ilang lungsud sila ray naay 17 milyones nga sports car. Ang uban mopasigarbo nga sila ray naay rilong Rolex sa ilang Christmas party samtang ang uban cellphone ray gamiton pag tan-aw sa oras. Pero unsa may imong buhaton kung wa gyud ka nahut? Di ka kapalit og auto ug rilo.
NG: Unsa man Nyor.
ND: Mo subscribe kag conspiracy theory. Kining mga klasiha sa tao manghambog sa ilang kaugalingon nga mas bright sila nato kay nakahibawo sila nga dunay conspiracy sa paglimod nga flat diay ang kalibutan. Ug kita, alang kanila, mga bugo nga ga mata lag buntag, nag pailad sa mga scientist nga miingonnga susama sa lignin nga bola ang kalibutan.
NG: Unsa man sad ning hallow earth theory.
ND: Mao ni opposite sa alien ug flat earth theory nga gi promote sa mga fake scientists. Kining hollow earth theory na inspired gikan sa folklore, mythology ug religion sa mga karaang panahon. Gatuo sila nga ang kalibutan susama sa bagul sa lube basiyo ang tunga niani. Ang uban gaingon nga nanimyo diha ang dautang elemento. Dunay motuo nga diha ang impyerno. Duna say uban ng moingon dunay gingharian sa maong lugar nga maoy gapadagan sa kalibutan. Gatuo sila nga dunay mga langub nga masudlan paingon didto.
NG: Di sad ka motuo ani Nyor?
ND: Susama ra ni sa panuhot silang tanan Nyor nga makaamgo ka lang inig humag pangutot.