Gerard Pareja
Samtang naniudto mi miagi ang trak sa basura.
“Naa lagi basurero nga Sinulog man ron,” matud pas akong igsuon.
Ang garbage collection usa sa pinaka inconsistent o pinaka way klaro nga serbisyo sa gobyerno sa atong dakbayan.
Daw sila ray nahibawo sa ilang schedule. Ug kon dili magkatakdo ang imong schedule sa ilaha aw, magtapun-og imong basura. Ug kon dunay di kahuwat ilabay na lang ang ilang basura sa daplin sa dalan o di kaha dauban, bahala nga madugta ang baga sa ilang silingan.
Maong nahimuot ug nalipay kami nga dunay daw nasa-ag nga garbage collector diri sa amoa ning panahon sa Sinulog.
Aw, hinuon wala may contingent sa Sinulog ang mga garbage collector ug maong nanarbaho na lang sila bisa’g Domingo ron ug Sinulog pa gyud.
Kining gibuhat ning mga basurero ning panahun sa Sinulog nakapahinumdom kanako niadtong mga NBA player nga mihangyo nga di lang unta kuno sila paduwaon og basketball sa panahon sa holidays kay buot sila nga makighiusa sa ilang pamilya sa Pasko ug Bag-ong Tuig.
Pagka hanggaw baya.
Ang ilang trabaho, duwa. Ang ilang duwa kalingawan sa mga dagahang mananaway. Tungod niani, minilyon ka dolyares ang ilang suhol.
Ang kadaghanan sa mga tao mangita’g kalingawan atol sa holidays. Mao kini ang higayon nga libre sila.
Ug duna usab silay salapi nga mawaldas gikan sa ilang mga bonus. Dagko’g abot ang mga team, mga arena ug mga networks ning panahuna. Unya kon tagaan nimog Christmas o holiday break ang NBA players, unsa pa may tan-awon sa mga basketball fans. Unsa naman lay maani sa mga arena ug networks.
Dili lang ang mga entertainers ug basurero may maglihok atol sa holidays. Lakip kania ang mga pulis, bombero, doctor, nurse ug mga negosyante nga motan-aw sa holiday isip okasyon sa ubay-ubay nga halin.
Apilon ta na lang sab ning maong pundok ang mga call center agents ug ang mga elected officials.
Matud pa sa usa nako ka amiga sa call center: I went to work on the last day of the year and came out on the first day of the following year.
Pagkanaug niya sa entablado sa katapusang Sinulog sa iyang pagka mayor, mihunghung si Mike Rama sa microphone ug milanog kining maong mga pulong: “Trabaho na, Edgar.”