SUAREZ
Niadtong Huwebes sa gabii sa akong radio program sa DYSS Super Radyo nagpahigayon kog 5 minute survey pagka-mayor dinhi sa Siudad sa Sugbo nilang Mayor Tomas Osmeña, Vice Mayor Edgardo Labella ug former City Mayor Michael Rama.
Miresulta nga si Labella maoy pinakadakug kuha nga miabot og 28 samtang kang Tommy 11 ug 4 kang Rama.
Ambot kung naminaw ba si Rama sa maong survey nga maoy nakaingon nga posibleng mo-atras lang siya sa karera pagka-mayor ug posibleng mag bise mayor nalang.
Hinoon layo pa man ang eleksiyon apan mas maayo sab nga maminaw sa pulso sa katawhan ang atong mga politiko. Lisud nang mapasubo lang.
* * *
Sobra gyud ka iresponsable ang pamahayag ni Chief Inspector Jovie Espinido kinsa nagkanayon nga iyang gikalipay ang kamatayon ni Atty. Jonah John Ungab, Vice-Mayor sa Ronda.
Nagparehas lang sila ni Mayor Tomas Osmeña nga nalipay sab human gi-ambush patay si Ermita Barangay Captain Imok Rupenta.
Dili man siguro haom nga pun-an pa ang kasakit ug kaguol sa nagbangutan nga pamilya ni Atty. Ungab.
With all due respect, dili sab ko katugkad sa ipasabot ni Chief Inspector Espinido nga “partner” si Atty, Ungab sa iyang kliyente nga si self-confessed drug lord Kerwin Espinoza sa sindikato sa drugas.
Ang akong pagsabot nga kung “partner”, kana gyu’ng mo-apil pag-aswat sa sinakong shabu, moapil pag-repack , pagtimbang ug pag-distribute ngadto sa mga dealer.
Kung kutob ra si Atty. Ungab pagtabang sa legal nga aspeto ni Kerwin ug sa mga kauban niini nga nadakpan sa shabu, mahug ra gyud nga retainer lawyer si Atty, Ungab sa grupo ni Kerwin.
* * *
Unsa man gyud ang mas duol sa tinuud nga motibo pagpatay ni Atty. Ungab?
Ang iyang pagka-abogado ni Kerwin? Pulitika sa Ronda diin ilang uyu-an nga si Mayor Mariano Blanco maoy mapasanginlan? O ba kaha ang iyang pakiglambigit og mga babaye?
Ang pag-insister sa pamilyang Ungab sa anggulo sa pulitika, wa kaha kini nila tuyu-a aron lang pang damage control kay sa mas makaguba nga alegasyon ni Chief Inspector Espinido nga “partner” siya ni Kerwin?
Maglisud kog sabot kung ipapatay ni Mayor Blanco ang iyang pag-umangkon nga paborito.
Sa iyang pagkalambigt og mga babaye, ambot lang sab kung capable ba ang mga babaye ug ilang pamilya nga mopatay sa abogado.
Kung sa iyang paglaban ni Kerwin maoy nakaingon, posible kaha nga taga gobyerno ray responsable? Apan kung ang Duterte administration maoy responsable maka-ako pa kaha sila sa pagpatay ni Vice Mayor nga ila namang kaanib sa pulitika?
Dili kaha si Kerwin ug iyang mga tawo kinsa nahiubos sa abogado dihang mitapon sa partido ni Duterte nga maoy nakaguba sa ilang sindikato ug gitohoang responsable sa pagpa-patay sa amahan ni Kerwin nga si Mayor Espinoza sulod sa prisohan?
* * *
Nahiubos si Pearl, asawa ni Atty. Ungab kanamo sa Cebu Daily News (CDN) nga maoy hinungdan nga wa nila pasudla among mga kauban nga sila si Ador Mayol, senior reporter ug Junjie Mendoza photographer sa ilang gipatawag nga press conference.
Nasaypan ni Pearl nga critical ang CDN sa iyang bana kay gipang-publikar ang tanang background ni Atty. Ungab isip controversial practicing lawyer.
Gawas pa, nasuko siya sa mga cameramen ug mga photographers kay samtang iyang gitabang iyang bana sulod sa ilang kotse human gipusil, way nitabang nga mga mediamen.
Maayo sab tingale nga masayod ang pamilyang Ungab nga wa ma train ang mga tigbalita pagka paramedics.
Gawas pa, sa mga training sa media gibawalan na intawon kami kay daghan na’ng na-impas nga kinabuhi sa tira pasagad nga tabang-tabang ug gawas pa sab kasuk-an mi sa mga pulis kay dili na ma-preserve ang crime scene.
Dunay nahitabo kaniadto nga dihay usa ka reporter sa radyo nga mitabang pag-pump sa biktima sa pusil sa karaang CCMC nga puwerteng pataya sa biktima kay wa magkadimao ang trabaho sa reporter.
Maglaum ko nga makasabot sab ang pamilyang Ungab sa among trabaho.