SUAREZ
Dura lex sed lex”, maoy ni – Latin sa pulong sa mga abogado nga “the law might be harsh but it is the law”. Nagpasabot nga bisag bangis ug tampalasan kaayo ang balaud apan lagi kay balaud mao gyu’y mopatigbabaw ug mapatuman”.
Kini maoy akong intrada ning akong lindog karon kay misamot kadaghan ang mireklamo sa gipatuman nga ordinansa sa dakbayan sa Mandaue sukad niadtong March 5 nga nag ban pagsul-ob og face mask, bonnet, ug uban pa’ng sul-obon nga makatabon sa nawong sa mga magmotorsiklo ug magtricycle.
Sa data sa TEAM Mandaue, dul-an na 600 ang mga nadakpan kay way exempted bisag kadtong mga gipang-diagnosed sa cancer ug pulmonary diseases nga gi-require nga magsul-ob gyud og mga protective face mask o surgical/medical mask.
Way gipasaylo sila si Glenn Antiqua bisag dunay dala nga medical certificate kay wa silay mahimo kay kuno way exempted sa ordinance.
Ang mga opisyales sa Mandaue miingon nga tun-an pagbalik ug posibleng amendahon ang ordinansa ilabina nga tag 5 mil pesos ang molta.
With all due respect, logic dictates kinahanglang may konsensiya sab ang mga enforcers. Dakpon gyud diay bisag dunay mga balidong rason ang mga motorista?
Ang tuyo sa balaud mao nga mailhan dayon ang mga riding-in-tandem criminals nga mag motor.
Kanus-a man nahimong criminal ang mga masakiton? Ang mga nag-cancer nga gi-require pagsul-ob og face mask sa ilang doktor, maka-afford pa ba sa paghimog krimen?
Tinuud ang balaud way konsensiya pero ang tigpatuman sa balaud may konsensiya.
Mao nga alang nako, automatic na’ng exempted ang mga masakiton labi pa kung may dala nga medical certificate.
* * *
Ambot kung unsa ka tinuud ang pangangkon sa usa ka on call nga masahista nga nakigkita kang Sir Bobby Nalzaro sa GMA complex niadtong miaging simana nga naka-ila siya sa gun man nga nipatay kang Ronda Vice Mayor Atty. Jonah John Ungab kay kuno iyang silingan.
Nangangkon siya nga gihulga sa suspetado ug gibawi ang iyang cellular phone kay sumaa pa nag-video siya sa wa pa ang krimen.
Lain niyang gipasi-atab nga sa wa pa pusila si Atty. Ungab iyang nakit-an nga dunay lalaki nga nagsakay og sakyanan nga mitunol sa sobre ngadto sa gunman nga iyang silingan.
Di ba kaha panglawgaw sa nagpadayong imbestigasyon ang pangangkon sa babaye.
Gawas pa sab, di ba kaha tuyo nga gusto lang gyud niyang bulabugon ang gipalutaw nga teyoriya sa kapolisan nga posibleng napatay na ang gunman sa mga operatiba dihang misukol atul sa pag-serve sa warrant of arrest kinsa ang napatay nagsul-ob sa susamang kolor sa senina.
Labing tinuud nagduda gyud ko niya kay sa video footage nga akong nakita sa Qimonda, way lalaki nga nagsakyanan nga mitunol og sobre sa gunman ug way babaye nga nag-video ug giilogan sa gunman sa iyang gadget sa wa pa ang krimen.
* * *
Pagkanindot sa balita sa Department of Energy (DOE) nga nakompirmar na sa mining oil exploration nga may daku’ng deposit sa mineral oil ug natural gas nga pang-commercial diha sa lungsod sa Alegria Cebu.
Sumaa pa moabot sa 9.42 billion cubic feet ang nagpondo nga natural gas.
Kung mapahimuslan man kini puwerteng dakua’g ikatabang sa natad sa ekonomiya sa taga Alegria ug sa mga sikbit nga mga lungsod.
Panahon na nga molambo ang taga habagatang Sugbo nga kanunay lang nakalimtan sa Kapitolyo ug sa national government.