Gerard Pareja
Daghan ra kaayo ang gadanghag sa kagamhanan. Daghan na kaayon kitang mga balaud pero dili nato mapatuman. Tingali kay gamay ra kaayo sa nangatungdanan ang nakasabot kon unsaon sila pagimplimentar.
Ug naklaro nasad pagusab ang pagkadanghag ug pagka way alamag sa atong mga opisyal ning dismissal sa mga kaso buta ning duha ka gikatahapang mga drug lord nga sila ni Kerwin Espinosa ug Peter Lim.
Bisan pa man ug wa pa mahusgahi ang duha sa ilang mga kaso ang kadaghanan gatuo nga may kalabutan gyud sila sa ngosyo sa drugas.
Tingali may mga mulalis nga inosinte kining duha.
Ang nakapait lang kay ang pag dismiss sa ilang mga kaso wala may kalabutan sa ilang pagka inosinte.
Gi dismiss ang ilang mga kaso kay ang bugtong witness batok kanila gabalibali ang mga gipanulti ug maong sa ingon dili kini kasaligan.
Nagkanayon ang piskal nga mi-dismiss sa kaso nga si Aristotle Reyes nga ang mga pulong sa testigo nga si Marcelo Adorco wa magkadimao. “His inconsistencies in his statements affected the credibility and veracity of his narration,” matud pa ni Reyes.
Walay laing ebidinsya batok sa duha ka giingong mga drug lord gawas sa pulong ni Adorco.
Ug mipaghut dayon ang kampo sa bilangong Senador Leila Dilema nga kon na dismiss ang mga miingong misuborno kaniya sa pagpalusot sa mga druga angay lang nga i-dismiss usab ang mga kaso batok kaniya.
Unsa man diay kadtong pagangkon ni Espinosa sa iyang mga binuhatan sa imbistigasyon sa senado.
Niani miingon si Reyes nga wala gisumitir sa PNP-CIDG ang transcript sa imbistigasyon sa senado ug maong di kini magamit sa mga porsecutor.
Wala kaha mapalit si Reyes ug ang ubang mga porsecutor.
Dunay mga moinsistir nga mao kini hinungdan sa dismissal apan sa mga pinatyanay nga nahitabo ning kampanya kontra druga maglisud kog tuo nga ibaylo sa mga piskal ang ilang kinabuhi sa pipila ka milyon ka pesos.
Mas motuo ko nga resulta kini sa kasagarang mahitabo sa pagdinanghag sa mga naa sa katungdanan.
Duna say miingon nga puros drama lang kining gipanhimo sa gobyerno.
Chaka na?
Kon tinuod man gani kini, tingali maayong ilisan na ni Digong ang iyang mga actor.
Kon dunay Purisima ug Abad nga nagbulabog sa kagamhanan ni PNoy duna say mga Kingkoy sa gobyerno ni Digong nga sila ni Aguire ug Bato dela Rosa.
Gakiat lang agi aning duha.
Gisumbag kunong Digong, matud pang Bato, ang bungbong dihang nahibawoan niini ang dismissal ning maong kaso. Ug gani mihubag man ang kamot niani. Intawon sa aning istoryaha uy. Angay ba gud ning isibya.