Gerard Pareja
Unsa may buhaton mo ning summer nga namatay si Mini Me?
Maligos dagat? Pwerti intawon nga inita uy.
Niadtong bata pa ta di ka duot ang init nato.
Hala bisiklita tibuok buntag, luksos dagat inig udong tutok dayon laroylaroy sa kadalanan hangtud sa kliumklium.
Mouli lag matuog.
Pero karon murag dali naman mohapdos atong panit ug mosakit ang atong bagulbagol.
Ang kuyaw og ang tangkugo maoy mo sakit.
Kasagaran kanato duna may trabaho bisag summer mao nga wala kaayoy panahon para mohunahunag unsay buhaton ning ting-init. Pero sa adunay mga free time ania akoy mga pipila ka sugyot.
Una, maghimo ug kon mahimo mamaligyag kontra-init nga mga butang sama sa ice, ice water, ice candy, paypay, sun visor ug uban pa. Pwerting halina sa ice ron.
Moabot sa ka sa ika limang tindahan gikan sa inyo una ka mkapalit og ice. Ang naka paet lang aning ice kay ang plastic niani maoy magdag bara sa canal.
Ika duha, pagkat-on og bag-ong buhaton.
Daghan kaayong workshop pero ang problema kay kasagaran niani para man sa mga bata. Pero ayaw kamo pagtuo sa giingong “taas na ang lubi” ug nga sa imong daku nga pangidaron w aka nay makat-unan.
Maayo tingali nga mosuway kag kat-on og pag gamit og musical instrument.
Lisod kini alang sa mga dili kaayo musically inclined. Nanginahanglan kinig taas nga pasyensiya. Ug samot nga mas lisud kini sa mga sama kanako nga pirming was timing.
Pero sigue lang kay sa imong pagkaskas mkalimtan mo man ang kainit.
Pwedi sang motuon kag drawing o pamintal.
Mas daghang scientific nga paagi para pagkat-on niani mao nga alang kanako mas di kaayo kini lisud itandi sa pagkat-on og musical instrument. Hinuon mas gasto kini.
Ug nanginahanglan sab og kugi.
Ug mahimo sab nga motuon ka og bag-ong lingwahi.
Mas minus kinig gasto kon aduna kay computer sa inyo.
Matud pas mga eksperto, kon makatigum kag 500 ka pulong sa usa ka sinultian ug sigihan mo kinig bansaybansay kada adlaw, makahibaw kana nga mogamit ning maong lingwahi sulod sa duha ka tuig.
Ika tulo, kon di ka ganahan mo exercise sa imong utok, maayo tingali maghimo o magpahimo kag duyan taliwa sa duh aka punoan sa lubi.
Nindut kaayo ang pagkatuog nimo ning maong duyan daw mobalik kas mong pagka bata. Ang kuyaw lang niini og mahugan kag lubi.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
