Gerard Pareja
Tingali tungod kay si Rama, nga dili duol sa luwag sa ruling party niadto nga mao ang Liberal Party, mao may mayor niadtong sa miaging unom ka tuig, wa gyud malihuk ning BRT o Bus Rapid Transit.
Ambot kon ang Liberal party bay ga langanlangan sa paghimo sa ilang lakang o si Rama bay way alamag ning maong proyikto. Kon makahinumdom pa mo di ba ang tanang lihuk ni Rama kabahin sa SRP kanunay mang babagan sa City Council nga gi dominar sa mga tao ni Tomas.
Time waits for no one, matud pas Rolling Stones.
Giplano ang BRT niadto pang 2008. Giaprobahan ni pagka 2014.
Tunga-tunga na ta sa 2018 wala pay katunga sa planning nga nahimo.
Planning pa na ha.
Unya mintras ang mga oras nahimong adlaw ug ang mga adlaw nahimong buwan ug ang mga buwan nahimong mga katuigan, nagkadaghan ang mga tao sa Sugbo.
Unya pweting igata ning mga bangko ug mga tigbaligyag sakyanan nga gasiguig paubos sa down payment sa mga car loan. Tanang tao buot mopalit og awto para molikay sa traffic pero ang ilang mga bag-ong sakyanan mao ra say gada sa traffic.
Tingali niadtong 2008 feasible pa kini.
Di na baya parehas ang kahimtang sa dakbayan niadtong miaging dekada kon itandi sa karon.
Pero simple physics o geometry ra man gani tingali ni nga kon ang gahuot nga kadalanan kuhaan pa nimog luna para sa mga dagkong bus, natural lang nga mosamot kinig ka huot.
Sakto man si Tomas nga kon malampuson ang usa ka mass transportation system maingganyo na ang mga tao nga mosakay na lang niani ug di na mogamit sa mga pribadong sakyanan
. Pero di baya ni maoy mentality sa Pinoy nga motan-aw sa sakyanan isip status symbol o timailhan sa pagka malampuson.
Hangtud makat-on ang Pinoy ning cultural paradigm shift nga di na magdamgo og awto, mag antos lang una tas traffic nga magkamang sa peak hours.
Si Finance Secretary Carlos Domiguez (nga mipa kasilar unta sa BRT) ug ang NEDA-ICC (National Economic and Development Authority’s Investment Coordination Committee) mihisgut nga kinahanglang iapil sa plano sa BRT ang pagpalagpad sa kadalanan nga agian unya sa mga dagkong bus.
Ang pangutana karon nga gatanag og dajong ganti: apil ba ang road widening sa naaprobahan na nga BRT plan?
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
