Akong nakita nga epektibo kini kay paralisado man lagi karon ang mga terorista sa Mindanao ilabina sa Marawi.
Epektibo sab karon ang pakiggubat batok sa Bangsamoro Islamic Freedom Fighters (BIFF) nga ubay-ubay na ang namatay.
Kining problema sa drugas way kalainan sa terorista. Dili puwede nga magbinayot ang gobyerno. Kinahanglang bagsik gyud.
Akong isugyot sa presidente nga kadtong mi-surrender na sa “tokhang” ug kadtong nailhan nga mga drug addict/users ibutang sa usa ka Isla alang sa comprehensive drug rehabilitation nga way makasibat.
Akong tuyo nga ma isolate sila aron dili gyud makapalit og illegal drugs aron mapatay ang negosyo sa sindikato sa drugas.
Kinsa pa may mamalit kung ang tanang adik ma neutralize sa gobyerno? Patay gyud ang negosyo sa Insik.
* * *
Dili ko kabasol ni Presidente Duterte nga namasangil kang kanhi Cebu City Mayor Michael Rama nga usa ka drug protector tungod sa mga sirkumstansiya.
Gawas nga nakigdula kaniadto si Rama og basketball kang anhing Crisostomo Llaguno alyas Tata Negro nga usa ka dakung drug personality, iyang close-in body guard si PO3 Jonathan Tilos kadtong napatay sa Alegria nga tawo ni confessed drug lord Franz Sabalones.
Si PO3 Tilos nakompirmar sa iyang mga opisyal nga usa sa mga sinaligan ni Sabalones.
Samtang kadtong opisyal sa PNP nga napatay sa buy bust operation sa Mandaue nga si S/Inspector Raymond Hortezuela, batch mate ni PO3 Tilos niadtong 2006 pagsulod sa PNP.
Si Tilos tawo ni Franz samtang si S/Inspector Hortezuela sakop ni Jeffrey “Jaguar” Diaz.
Ang akong pangutana, pila man gyud diay ka pulis nga sakop ug protector sa sindikato?
* * *
Unsa man gyud ang motibo sa lain-laing pagpatay sa tulo ka mga pari?
Karong bag-o sa kaso ni Fr. Richmond Nilo sa Nueva Ecija, ang pipila ka mga anggulo nga gisubay sa kapolisan mao nga ang panagbangi sa yuta.
Laing anggulo nga mitabang ang pari sa biktima sa pag molestiya ug ang ikatulo mao ang away sa relihiyon.
Subo gyud kaayong palandungon nga mahitabo kini sa mga pari.
Ang nakaporke pa gyud karon kay gipun-an ang eskandalo sa simbahang katoliko sa ubang mga tawo nga migamit og social media pinaagi sa pag-post sa pipila ka mga eksena nga nahimong negatibo ang mga pari.
Dihay post nga ang pari nag-yawyaw sa iyang wali ug gipikhan ang usa ka inahan nga nagpabunyag sa iyang anak nga way bana unya dihay laing post nga ang pari mi-atake ug mikulata sa usa ka ginang ug mi-bubo pa sa dalang tubig.
Paeta gyud!
* * *
Mabakante na karong July 26 ang puwesto ni Ombudsman Conchita Carpio Morales subay sa iyang retirement.
Dunay napulo ka mga aplikante nga interbiyuhon sa Judicial and Bar Council (JBC) karong simanaha nga usa na niana mao si Labor Secretary Silvestre Bello III.
Ang ako lang kung kinsa may itudlo ni Presidente Duterte nga Ombudsman kinahanglang transparent gyud sa publiko gawas nga ligdong ug tarong.