Lloyd Suarez
Unsa man gyud ka accurate ang giingong gipagawas nga listahan gikan sa Malacañang pinaagi sa 888 hotline nga dunay piskal ug sakop sa media sa Sugbo ang gi-validate karon sa R2 Intelligence Division sa Police Regional Office (PRO-7) nga magdawatan og sinimana nga payola gikan sa Philippine Drug Enforcement Agency (PDEA-7).
In fairness sa piskal wa koy kasayuran sa iyang lifestyle kung unsa siya ka galante. Dili siya Sugbuanon.
Apan bahin sa usa ka sakop sa media, lisud kaayong toho-an kay nagkagidlay gani intawon sa pagpuyo.
Gani ang iyang ATM atoa sa iyang utanganan og kuwarta unya dili na gani intawon pautangon hangtod nga dili ka impas.
Akong gitawgan ang maong media personality ug iyang giklaro sa taga R2 nga dili intawon siya ubos sa payroll sa maong law enforcement agency.
Iyang gi-angkon nga sa panahon nga dunay successful operation sa lawom nga kagabhion, tawgan siya unya paadtoon sa venue sa operation unya pasaksihon ug papirmahon sa inventory receipt sa mga nakuha nga kontrabando unya hatagan siya og pamilite or pang-gasolina gikan sa P500 ngadto sa P1,000.
Sumaa pa, gawas sa PDEA mao sab kini ang gi-practice sa PNP.
Si Arnold Bustamante presidente sa pundok sa mga tigbalita nga nag-cover sa kapolisan ug ubang law enforcement agencies, mitug-an nga siya maoy nagsugyot sa kapolisan, sa PDEA ug ubang units nga hatagan og pang-gasolina ang mga sakop sa media nga pa-pirmahon sa inventory receipts ilabina panahon sa lawom na’ng gabii kay dihay usa ka sakop sa media kaniadto nga gipa-pirma didto sa Bohol operation unya kuot intawon sa personal nga kuwarta sa iyang pamilite unya gipabalik-balik pa sa korte pagpa-testify.
Si Bustamante nga dili mokompiyansa ning maong listahan miingon nga mopasar ilang grupo sa PNP Defense Press Corps og resolution nga magsuporta sa maong mediaman nga usa ka tarong ug ligdong nga sakop sa prensa kay nasayod sila sa kahimtang sa pagpuyo.
Balik sa maong tigbalita nga midawat sa ihatag nga pamilite sa PDEA, unsa may kalapasan kung kining maong kuwarta iya sa gobyerno nga tipik ug kabahin sa contingency or intelligence fund?
Ang dakung isyu dinhi kung kuwarta kini gikan sa mga drug lord o mga drug personality nga nadakpan unya apil ang media pag compromise sa kaso.
Kinahanglang maklaro kining maong isyu sa taga R2 Division kay simbako baya labngon og pito ka lawod mahitabo ang dili maayo sa among kauban.
Wa kaha kini tuyo-a aron patak-omon ang mga sakop sa media sa Sugbo?
Kung mao ning kalakiha, usab pay maglayog nga mopirma sa inventory receipt ang mga tigbalita sa mga illegal drugs operation.
Paeta gyud kay mao pay motabang sa gobyerno sa kampanya unya mabutang pa sa alanganin ug marisgo pa ang kinabuhi.
Unsa kahay maayo nga mo-petisyon ang tanang pundok sa mga tigbalita nga iparepaso sa kongreso ang Republic Act 9165 (Comprehensive Law On Dangerous Drugs Act) ug ipatangtang ang
provision nga paapilon ang mga tigbalita pagsaksi sa inventory human sa illegal drugs operation aron hingpit nga makalikay?