SUAREZ
Pagkanindot kung matuman ang mga pangandoy ni Dr. Rene Catan hepe sa Integrated Provincial Health Office (IPHO- Capitol) nga mapalambo niya sa hingpit ang upat ka mga provincial hospitals ug 12 ka mga district hospitals sa lalawigan sa Sugbo.
Way Sugbuanon nga mosupak niini kay gikinahanglan ang batakang serbisyo alang sa atong panglawas.
Labaw na gyud kung ang upat ka mga provincial hospitals nga anaa pa sa level 1, mahimo na’ng level 3 category sama sa Vicente Sotto Memorial Medical Center (VSMMC) nga makahimo na sa tanang mga major medical procedures nga komplikado kaayo sama sa heart-bypass-operation, kidney transplant, head surgery ug uban pa.
Pagkakaron ang atong 12 ka mga district hospitals anaa pa sa infirmary level category nga gipasabot ni Dr. Annessa Patindol, Licensing Section Head sa Department of Health Region 7 nga igo ra’ng makatagad niadtong gagmay’g sakit nga out-patient ug pang-emergency nga ginagmay.
Ang upat ka mga provincial hospitals nga nagbase sa Carcar, Balamban, Danao ug Bogo nga pulos level 1 category, nagpasabot nga may operating room, may blood station, ug mga serbisyo nga anaa sa infirmary level.
Target ni Dr. Catan nga kining mga provincial hospitals mahimo na’ng level 2 category nga nagpasabot nga makahimo na’g mga major operations, may mga Intensive Care Units (ICU) ug Neo-Intensive Care Unit (NICU).
Tinguha usab niya nga ang duha ka mga district hospitals sa Bantayan ug Camotes Island nga anaa sa infirmary level mahimo na unyang level 1 category.
Iyang gipasabot nga nagkinahanglan sila og dul-an 2 bilyones ka pesos alang ning maong katuyo-an.
Apan kung maghisgot sa hingpit nga pagpalambo ug pag-upgrade sa tanang provincial ug district hospitals mogasto ang gobyerno og 8 bilyones ka pesos sumaa pa ni Catan.
Niadtong Sabado atol sa among programa’ng “Dialogue On The Air” sa DYSS Super Radyo akong nahibaw-an nga mas bintaha ang Carcar Provincial Hospital ikomparar sa uban kay anaa nay state-of-the-art nga facility nga laparoscopy tower nga makahimo og mga major operations sa gallbladder nga sama og laser nga dili na kinahanglang ipa-open surgery nga dagku kaayog hiwa.
Makahimo usab si Dr. Catan sa pagpang-opera sa bukog didto sa Carcar.
Si Dr. Mario Joyag Jr. nga maoy OIC Chief of Hospital sa Carcar, masaligon sab nga sa dili pa matapos ang tuig duna na silay CT-Scan.
Gi-ubanan si Dr. Joyag nila ni Dr. Rio Dela Peña ug Dr. Daisy Lou Abarquez pagpasabot sa ubang mga serbisyo sa Carcar.
Sila si Dr. Olivia Dandan, Chief of Hospital sa Balamban ug Dr. Prudencio Manubag, Chief of Hospital sa Danao naglaum nga maparehas ilang estado sa Carcar.
Dili sab magpa-ulahi ang Balamban ug Danao. Si Dr. Manubag miingon nga posible sila pay makauna sa Carcar paglangkat sa level 2 category.
Giimbitar namo og apil si Dr. Ian Genaldo ang OIC Chief of Hospital sa Minglanilla aron sab makapasabot intawon sa pipila ka mga isyu nga nahitabo.
Iyang gisaad nga bisag anaa sa infirmary level ang Minglanilla District Hospital naningkamot sila nga wa gyu’y balibaran nga pasyente.
Si Dr. Reynette Christine Ligaray nga gipadala ni Dr. Gerardo Aquino sa Vicente Sotto nalipay kaayo og daku niining mga kalambuan karon kay migitib ang tinguha nga makabaton kitang mga Sugbuanon sa universal health care.