Lloyd Suarez
In fairness, maayong pagkagaray ang Oratio Imperata sa Simbahang Katoliko nga nanawagan sa pagpahunong sa sunod-sunod nga mga patay dinhi sa Sugbo.
Apan dunay dakung kulang sa linya, with all due respect ngadto kang Cebu Archbishop Jose Palma.
Maayo unta nga idugang sa maong pangaliya nga moundang na intawon ang mga druglord ug ubang nalambigit sa droga kay kini maoy hinungdan sa pinatyanay karon.
Nindot sab unta nga ipasabot sa katawhan nga kining atong lawas dili sudlan og droga ngan nga balaan kini kay templo sa Diyos.
Busa atong ipalaglag ang mga druglord nga ang tuyo ug tumong mao ang paggusbat sa atong lawas.
Akong gikopya en toto ang maong pangadye ug mao kining mosunod:
“Langitnon namong Amahan, tinubdan sa kinabuhi ug sukaran sa kalinaw, kaming imong mga anak nahasubo, nabalaka ug nahangawa tungod sa sunod sunod nga pagpatay sa among mga igsoon. Nangaliyupo kami kanimo; pukawa ang hunahuna sa wala magpakabana, samoka ang tanlag sa nagpasiugda, kablita ang kasingkasing sa mga miuyon, hupaya ang dughan sa mga naguol. Tagai kamig kaisog sa pagsupak sa mga dautan, sa pagbuhat ug maayo, ug sa pagsalikway sa mga hiwing pamaagi. Panalipdi kami sa mga bakak sa yawa, ug palingkawasa ang among nasud sa gahum sa dautan. Kini among gipangayo pinaagi ni Kristo among Ginoo. Amen. Maria among inahan, iampo mo kami. San Miguel Arkanghel, iampo mo kami. San Pedro Calungsod, iampo mo kami.”
Pero taliwa nga gisugdan kining maong special prayer niadtong miaging Domingo, daghan pa gihapong patay nga nahitabo sa Sugbo.
Wa gyud koy pagsupak nga pamatyon sa atong kapolisan kining mga drug personality nga manukol atol sa legitimate operation.
Alangan pahari-on ang puwersa ni Satanas kay sa atong mga otoridad nga naningkamot sa pagpreserbar sa kinabuhi sa mga tawong nagtinarong ug nagtamod sa pagkabalaan.
* * *
Unsa ka tinuud nga gi-wiretap sa kapolisan kaming mga sakop sa Cebu media?
Kung tinuud man, unsa may tuyo? Panghadlok kay nabisto ang ubang patay nga ilang binuhatan?
Hinoon kung gi-apil man ko, wa ko mahadlok bisag 24/7 kay kalooy sa Diyos dili ko kriminal ug dili ko sakop sa sindikato sa ilegal nga drugas.
Gawas pa sab abli ang libro sa akong kinabuhi ilabina ang kahimtang ug estado sa pagpuyo..
Akong sublion nga wa koy pagsupak kung modeklarar og martial law si presidente Duterte kung ang kaayohan sa kinabag-an maoy gitan-aw ilabina ang seryosong pakiggubat sa problema sa illegal drugs nga misamot kamangtas karon.
Wa koy pagsupak ning tanan ilabina kung seryoso’ng ipatuman ang internal cleansing sa PNP organization ug sa tanang law enforcement agencies.
Ang nakaporke karon kay daghan pa’ng mga police scalawags, ninja cops nga aktibo sa serbisyo unya duna pay mga opisyal nga morag limpiyo nga nagkupot og mga sensitibong opisina. Paet!
* * *
Magpasalamat diay kog daku nilang Sir Chester Cokaliong sa Cokaliong Shipping Lines ingon man nila ni Sir Jefferson Go ug Sir John Maraat sa Cebu Eastern College ilabina kang Commissioner Ramon “Mon” Fernandez sa Philippine Sports Commission tungod sa ilang suporta sa nagpadayong liga namo sa mga sakop sa media nga mao ang Newsmen Basketball Association of Cebu (NBAC).
Ma busy na gyud among schedule karong mga panahuna kay gibuksan sab namo kagahapon ang 2018 Press Freedom Volleyball.