SUAREZ
With all due respect sa partidong PDP-Laban ug Barug Team Rama, usa gyud ka panglawgaw ug pangbulabog kining pag-insister ni kanhi Cebu City Mayor Michael Rama nga siya maoy mo-tandem pagka bise mayor kang Vice Mayor Edgardo Labella nga ilang pambato pagka mayor karong May 2019 elections.
Niadtong Biyernes sa buntag, misulong si Rama sa among sibyaanan sa DYSS Radyo GMA sa programa ni Sir Bobby Nalzaro aron subling ipahibawo ang iyang pag-apil-apil sa pulitika sunod tuig bisan wa pa malimpiyohi iyang pangan sa presidente pagka “drug protector”.
Misaad siya nga bisag i-clear na siya sa presidente dili gyud niya pulihan si Labella nga maoy ilang standard bearer ug aron dili kuno mabungkag ang ilang grupo.
Ang ako ba unsa man gyud ang garantiya nga modaug siya bisag mo-personal pagpangampanya ang presidente kang Labella?
Posible man gani nga mangamote og apil si Labella kay mawagtangan nag pagsalig ang mga botante ngadto sa partido ug sa presidente.
Ako pay Rama, mas maayong mopahuway lang una ug di gyud mag api-apil sa pulitika aron ligdong ang ilang grupo sa mata sa publiko.
* * *
Konbinsido nako nga ang pagka narco-politician ni Ronda Mayor Mariano Blanco III maoy hinungdan nga siya gipatay sulod sa iyang opisina sa munisipyo.
Dili katoho-an kanang gipasi-atab sa kapolisan nga ang motibo kabahin sa pamulitika.
Ayaw ko’g ingna nga mag-unay silag pinatyanay nga wa may history sa mga Blanco nga nagbuno sa pulitika.
Hinoon pabor sa mga Blanco kung politika ang anggulo kay pang damage control kanila.
* * *
Niadtong Sabado sa hapon atol sa among programang “Dialogue On The Air” sa DYSS Super Radyo, nga nagtuki kabahin sa subsob nga kampanya batok sa mga butane canister nga sudlan og liquefied petroleum gas (LPG) nahisgutan ang pangan ni Atty. Ramil Abing sa mga kadagkuan sa Department of Energy (DOE-7).
Ang isyu mao nga matud pa ni Atty. Russ Mark Gamallo legal officer sa Department of Energy (DOE-7) nga si Atty. Abing nagbuot-buot pagpa-release sa mga nasakmit nga mga refilling machines ug ubang ebedensiya nga anaa sa ilang storage sa Balili property sa Naga.
Sumaa pa ang maong mga ebedensiya iya kadto sa operator sa refilling station nga si Maria Amor Mahinay kinsa gironda niadtong May 2017 sa Minglanilla.
Human mi-plead guilty sa Minglanilla court si Mahinay, gi-asikaso ang pag-release sa mga ebedensiya.
Alang ni Atty. Gamallo sa DOE nga usa gyud ka highly questionable ang pag-release ni Atty. Abing kay dili gyud kini puwede.
Sa lagda automatic nga ma forfeit sa gobyerno ang mga ebedensiya.
Gawas pa sab ang pagpa-release ni Atty. Abing way pagtugot gikan sa korte.
Apan in fairness ni Atty. Abing miklaro nga legal ang iyang pag-release. Gani duna nay legal opinion ang Provincial Legal Office kabahin niini nga wa siya’y nalapas.
Ang taga-DOE nagtoon pa og mga kiha nga posibleng iduso batok kang Abing.