SUAREZ
Dunay ubang mga opisyal sa Kapitolyo nga medyo nahiubos sa akong lindog niadtong miaging Lunes nga mitikdol sa isyu bahin sa “Kuwadro Alas.”
Akong subli-on nga dili intawon nako batasan nga mag judgmental batok sa atong mga opisyal sa gobyerno nga gipang-akusahan nga adunay mga anomaliya ilabina niining nagkaduol na nga eleksiyon.
Unya nako makonbinse nga adunay corruption nga binuhatan kung duna nay conviction sa korte nga “with finality and executory.”
Dili sab nako batasan nga magpa-gamit og mga politiko kay bisan usa ka lugas nga monho wa ko mangayo ani nila.
Dili sab intawon ko klase’ng media personality nga binayran ug under sa payroll sa atong mga politiko.
Kung nagbuhat pa ko niining mga law-ay nga mga practices dugay nako gitangtang dinhi sa Cebu Daily News ug mismo sa management sa Radyo GMA DYSS Super Radyo nga dugay na nakong gi-ampigan ang akong kridibilidad ug intigridad sa media industry.
Ang akong papel sa kontrobersiyal nga isyu bahin sa “Kuwadro Alas” mao gyud ang paghatag og kaangayan sa mga gipang-akusahan nga mga opisyal nga giingong mihimo og mga anomaliya nga giingong nakadaut sa Davide administration.
Ambot kung kinsay nag-una pagbunyag ani nila nga “Kuwadro Alas” nga sila si Provincial Administrator, Atty. Mark Tolentino, Jone Siegfred Sepe, head sa Provincial General Services Office (PGSO), Jesus John Cobar – consultant ug ingon man si Baltazar Tribunalo Jr. kanhi hepe sa Provincial Environment and Natural Resources Office (PENRO) ug kinsa karon maoy nangulo sa Provincial Disaster Risks Reduction and Management Office (PDRRMO).
In fairness lagi intawon ani nila nga gipang-akusahan nga mga bagman ni Governor Davide, dili gyud maki-angayon ug bisan ngadtong Governor Davide kay wa gyu’y ebedensiya nga migitib batok kanila ug way mga disallowances nga gipagawas ang taga Commission on Audit (COA) sa nasudlan nga mga transaksiyon.
Nagpasalamat ko nga mitubag kanako ning maong isyu sila si Tribunalo ug Sepe.
Pulos sila nanghimakak ning mga pasangil ug pulos nagpasalamat nga ako silang gipangkuhaan sa ilang side.
Dalaygon gyud kaayo alang kanako ang mga opsisyal sa gobyerno nga dili mag onion – skinned.
Kung dunay isyu tubaga gyud tawon ninyo kay kung ang isyu magbalik-balik nga way tubag maoy toho-an sa publiko bisag bakak.
Lisud kung ang bakak maoy mopatigbabaw niining madangog nga kalibutan.
* * *
Akoy nasugo-an sa among management sa Super Radyo pagdawat sa plaque of recognition sa awarding ceremony nga gipahigayon ni DOH-7 Director Jaime Bernadas niadtong Huwebes (Nov. 15) alang sa mga deserving nga mga stakeholders nga partner sa departamento sa panglawas.
Salamat kaayo ninyo Director Bernadas kay makatabang kini alang sa himsog nga komunidad.
Ako sab ang gipadawat sa mga organizers sa plaque nga alang sa among TV sa GMA-7 Cebu.
Apil sa awardee si Governor Junjun Davide sa “Health Leadership and Governance Program for Provincial Level.”
Gihatagan sab sa DOH-7 og Special Recognition for Renal Disease Control Program ang upat ka mga Cebu Provincial Hospitals nga mao ang Balamban, Danao City, Carcar City ug Bogo City.
Kini maoy timaan nga wa mangatulog ang atong mga opisyal sa Kapitolyo sa natad sa pagpalambo sa batakang serbisyo kabahin sa panglawas.
Maglaum ko nga ipadayon ni Dr. Rene Catan sa Integrated Provincial Health Office (IPHO) Capitol ang mga maayong programa.
Magpasalamat sab ko ni Gov. Junjun, ni Vice – Governor Agnes Magpale ug sa mga sakop sa Cebu Provincial Board nga gisuportahan gyud ang pagpalambo sa atong mga district ug provincial hospitals.