CEBU CITY, Philippines -Usa ka helper sa usa ka kompaniya sa lumber ang namatay sa panagbangga sa usa ka pampasaheroang multicab ug sa usa ka tartanilla sa dalan C.Padilla sa Barangay Mambaling sakop ning siyudad sa Sugbu sa mga alas nuwebe kagabii sa Enero 1, 2019.
Duha pod ka mga pasahero sa multicab ang nangaangol sa aksidente ug nagpaalim karon sa bahay tambalanan.
Ang namatay mao si Jerry Bacalso, 26 anyos, og nagtrabaho sa Central Lumber Corp., matod pa sa iyang uyab na si Nichole Marie Ceniza, 25 anyos, na nidali og adto sa lugar na nahitaboan sa aksidente human kini napahibawo sa usa ka higala sa nahitabo.
Si Ceniza niila sa namatay na mao gyod ang iyang uyab na si Jerry Bacalso, matod pa ni Police Officer 2 (PO2) Randy Maroto sa Traffic Patrol Group nga maoy mi responde sa maong aksidente.
Usa sa mga naangol nailhan sa iyang ID nga si Mario Lopernes na usa ka empleyado sa Ventura Construction.
Sa imbestigasyon ni Maroto, ang namatay og mga naanggol naigo sa kahoy na taas sa tartanilla na naa sa kilid sa kabayo.
Si Maroto niingon nga ang pampasaherong multicab na padung sa Barangay Inayawan niovertake sa usa ka sakyanan apan nagkabangga nuon kini sa tartanilla.
Sa diha nga nahitabo ang aksidente, puno sa pasahero ang multicab na gimaneho ni Christopher Aleson, 34 anyos nga taga Sitio Paglaum, Barangay Bulacao sa siyudad sa Talisay, ug ang tartanilla na ang kutsero giila nga si Esteban Celocia, 42 anyos nga taga Barangay Inayawan sa dakbayan sa Sugbu, may tulo ka pasahero na sakay.
Si Maroto niingon pod na ang kabayo, ang kutsero ug ang iyang tulo ka pasahero wala nangaunsa sa aksidente. /dbs