With all due respect, daghan na gyud kaayong panghitabo nga layo ra kaayo ang mahulma sa cartographic sketch kay sa actual nga dagway sa mga suspetsado sa krimen.
Gani, bisan personal na nga dagway maglisud pa man gani og hinumdom ang mga testigo sama sa midagit sa batang 6 anyos nga si Ella Joy Pique didto sa Calajoan, Minglanilla diin unang gisignit mao sila si Karen Esdrelon nga usa ka registered nurse uban sa iyang fiancée nga si Sven Berger human matud pa maoy gipangtudlo sa mga testigo nga mga tinun-an.
Unya dihang gipasubay ug tarong, nasuta nga di mao ug karon ang gipangtaral mao na sila si Bella Ruby Santos ug iyang uyab nga usa ka Briton.
Mao nga makaingon ko nga hangtud karon, lubog pa gyud kaayo ang kasulbaran sa kasong pagbanhig-patay nila ni manlalaban Noel Archival ug sa iyang duha ka mga kauban didto sa barangay Coro, Dalaguete gikan nga mitambong sa bista didto sa Dumaguete City.
Daghang mga impormasyon nga akong nadawat apan akong tan-aw tabla ra sa tsismis kay wa gyuy igong basihanan.
Dunay mga kauban niyang abogado nga nagduda nga ang mastermind sa krimen mao ra sab ang usa sa mga kliyente ni Archival human nasuko kini kaniya pag-ayo.
Dunay laing impormasyon nga ang iyang kamatayon mugna sa sindikato sa drugas nga medyo lawom kaayo.
Ang uban nagduda nga ang pag-ambush nilang Archival sumpay sa gihuptan niining kasong pagpanulis sa Dumaguete diin ang gilabanan niyang kliyente ug mga kauban nakasakiyo og P8 million.
Di sab ko makabasol sa uban nga nagtuo nga ang mga responsable posibleng sakop sa military, Philippine National Police, Philippine Drug Enforcement Agency, National Bureau of Investigation ug ubang mga elite law enforcers kay “perfect” ang execution.
Wa bay naglagot ug nasuko ni Archival nga mga tinugyanan sa balaud human iyang gidaut pag-ayo ang kredibilidad ug integridad matag bista aron lang makaeskapo sa asunto iyang mga kliyente sa drugas bugti sa dakung kantidad?
Posible ba nga may kalambigitan ang pagpatay sa abogado sa iyang paglaban kang Philippine Benevolent Missionaries Association supreme master Ruben Ecleo Jr?
Maglaum ko nga masulbad kining maong kaso nga way inosenteng mapagan sa mga naglangkub sa Task Force Archival.
* * *
Sa “closed door dialogue” niadtong Biyernes sa hapon, akong nahibaw-an nga nagkasabot na ang mga huwes ug mga court personnel nga mamalhin na gyud sila karong Marso 17 sa Quimonda Building diha sa North Reclamation area.
Ilang okupahan ang ground ug 2nd floor sa maong building samtang ayum-ayumon pa ug panindoton ang mga sala sa 3rd ug 4th floor.
Akong nahibaw-an ni manlalaban Elaine Bathan presidente sa IBP Cebu City Chapter nga wa na silay mahimo sa pagbabag kay mando na gyud sa Chief Justice ilabina nga gitan-aw karon ang security sa mga huwes kay dunay daghang mga mahistrado ang nakadawat og mga hulga sa kinabuhi.
Pero ang nakaporke kay wa pa gyud mahibaw-i ang tukmang plano sa Cebu City Palace of Justice kay makigtagbo pa kang Cebu Gov. Hilario “Junjun” Davide III.
Alang lagi unta nako, mas maayo pang gipatrabaho nalang ang Cebu City Palace of Justice kay sa mogasto pa kita og dako sa Quimonda unya dul-an P2 million ang abang matag buwan.
Pagkadaghang building nga gipang-renovate nga wa na kinahanglana nga pabakantihan sa mga nag-okupar.
* * *
Gawas nga atong gisaulog karong adlawa ang ika-77th Charter Day Celebration dinhi dakbayan sa Sugbo, nagsaulog sab kami karon sa among ika 17th year anniversary sa dySS Super Radyo sukad na-re launch niadtong Feb. 24, 1997.
Pagkadali ra gyud diay sa panahon. Lab-as pa kaayo sa akong panumdman ang mga eksena niadtong unang adlaw sa pagsibya namo diha sa usa ka gamay ug apiki nga building atbang sa entrance sa University of Cebu habig sa may dalan Sanciangko.
Isip usa sa mga magsisibya sa Radyo GMA ako gihapong ikapasalig sa among mga suking tigpaminaw ang pagmintinar sa usa ka ligdong ug responsable nga magsisibya.
* * *
Magpasalamat kaayo ko og daku nilang Sir Chester Cokaliong sa Cokaliong Shipping Lines ingon man nila ni Sir Jefferson Go ug Sir Sammy Sia nga mga Executive Board sa Cebu Eastern College nga way putol pagsuporta sa among mga liga sa duwang basketball alang namong mga tigbalita dinhi sa Sugbo.
Magpasalamat sab kaayo ko ni Cebu City Mayor Michael Rama nga migahin gyud og oras taliwa sa iyang ka-busy ug kang Sir Elias Baquero presidente sa Cebu Federation of Beat Journalists (CFBJ).
Kagahapon, milampos kami pagbukas og laing conference sa Newsmen Basketball Association of Cebu (NBAC) diha sa Cebu City Sports Club sa Cebu Business Park nga gilangkoban sa lima ka mga teams: GMA-7/dySS; TV-5; CCTN 47-dyHP; Sunstar Daily/Brigada News; ug ang combined team sa Cebu Daily News ug sa The Freeman.
Gisugdan ang torneyo sa usa ka exhibition game tali sa NBAC All-Star versus sa selection sa Cebu Eastern College Alumni Basketball Association kon Cecaba apan wa gyud tawon mi magsilbe sa pagkahingigo og 3 points ni Sir Chester ug sa iyang mga team mates ilabina kang Sir Sammy Sia.
Sa bearing game kagahapon sa NBAC, midaug ang TV-5 sa CDN/Freeman samtang na-forfeit ang Sunstar/Brigada News kay kuwang sila og tawo tungod sa ka-busy.