Gi tabang sa mi responde nga medical team si Kerwin Oraiz, kinsa gi pusil patay sa Talisay City sa Huwebes sa buntag, Marso 7, 2019. | Contributed photo
Cebu City, Philippines — Trabahante sa usa ka inilang mall sa Dakbayan sa Sugbu ang gipusil patay sa wala pa mailhing gunman sayu sa buntag sa Huwebes, Marso 7, 2019, sa Talisay City.
Paingon unta mag duty sa iyang trabahoan si Kerwin Oraiz, 24 ang edad, dunay kapuyo ug lumad nga taga lungsod sa Kalape, Bohol, sa dihang gipusil siya sa usa ka lalaki samtang nag paabot og sakyanan tungod sa usa kan-anan sa Cebu South Coastal Road habig na sa Barangay San Roque sa siyudad sa Talisay pasado 6 a.m.
Basi sa initial na imbestigasyon sa kapulisan, ang suspek mi duol kang Oraiz ug wala abti og minuto, mi bunlot og armas ug walay langan gipusil ang biktima.
Gi sulod sa suspek og balik ang armas nga iyang gi gamit sa usa ka buyot ug ni sibat sakay sa usa ka motor nga mi duol sa gun man paghuman sa pagpamusil.
Matud pa ni Colonel Marlu Conag, hepe sa dakbayan sa Talisay, walay plate number ang motor nga gi himong get-away vehiclesa gunman.
Ang mga medical team nga mi responde sa dapit gi tabang ang biktima ug dali nga gi dala sa balay tambalanan apan gi deklara kini nga dead on arrival.
Padayun pa nangita ang kapulisan og dugang nga mga saksi sa insidente.
Wala pa usab sila nakit-ang posibleng motibo sa pag pusil patay sa maong biktima samtang nagpadayun pa ang imbestigasyon. /bmjo