Ang mga biktima sa pagpangdasmag sa may South Road Properties karong gabii, Marso 13, 2019, gidala sa usa ka ambulansya sa tambalanan sa siyudad sa Sugbu. |CDND Photo/Benjie Talisic
CEBU CITY, Philippines — Luwas na sa kamatayon ang tulo ka mga biktima nga mi labang sa coastal road area sa South Road Properties habig na sa dakbayan sa Sugbu pasado alas 6 sa sayong kagabhion, karong adlawa, Marso 13.
Si Chief Inspector Allan Rosario, ang hepe sa Traffic Patrol Group (TPG), mi butyag sa CDN Digital nga ang mga biktima nga dali gi dala sa balay tambalanan mao si Jenny Santos, 40 ang edad lumad nga taga dakbayan sa Bacolod didto sa Negros Occidental; si Ana Maria Axento, 60 ang edad ug molopyo sa Sitio Laray,Barangay San Roque sa siyudad sa Talisay; ug si Mary Kay Grajo, 19 ang edad ug molopyo sa Barangay Basak San Nicolas ning siyudad sa Sugbu.
Samtang na angol usab ang driber sa motor nga maoy naka bangga sa tulo nga si Ryran Lagon, hingkud ang edad ug molopyo sa Barangay Dumlog sa dakbayan sa Talisay.
Matud pa ni Rosario nga sa wala pa ang nahitabo nga pagkabangga, ang tulo ka mga biktima gikan sa dakbayan sa Talisay paingon sa dakbayan sa Sugbu misakay sa usa ka colorum nga jeep gikan sa dakbayan sa Talisay. Apan pag abot sa maong sakyanan sa atbang sa SM Seaside City gipakanaog ang tulo ka mga pasahero. Didto na ning dali dali ug tabok ang tulo sa pasahero paingon sa pikas nga dalan, nihungdan sa ilang pagkabangga sa usa ka naghaguros nga motor.
Ang usa sa nabanggaan nga si Jenny Santos nabali ang bukog niini sa too nga bahin, matud pa ni Rosario, samtang ang duha pa nga nabanggan ug ang driver sa motor naay mga pangos ug bun-og sa lawas./elb