Gitulis ang usa ka bakery sa dan F. Llamas St. pasado alas 4:00 ang takna sa kadlawon karong adlawa, Abril 2, 2019. CDND Photo / Benjie Talisic
Usa ka bakery ang gitulis sa wa pa mailhing lalaki sa dan F. Llamas, Barangay Punta Princessa, siyudad sa Sugbo, pasado alas 4:00 ang takna sa kaadlawon karong adlawa, April 2, 2019.
Ang biktima nga Liezel Luang, 29, lumad nga taga Santander ug tindera sa maong bakery, ang gitabang sa Cebu City Medical Center human kini gidunggab sa nagbinugtong nga tulisan.
Matud ni Corporal Cesar Santillan, team leader sa Punta Princesa Police Station, icepick ang gigamit sa suspek sa pagdunggab kang Luang ug naigo kini sa tuong bahin sa iyang lawas.
Nadangat sa tambalanan si Liezel Luang, 29, tindera sa usa ka bakery sa dan F. Llamas human kini gidunggab sa wa pa mailhing lalaki. CDND Photo / Benjie Talisic
Matud ni Police Staff Sergeant John Erick Samusa, ang imbestigador sa maong kaso, nakuha sa suspek ang halin sa bakery apan wala pa masuta kun pila kini.
Luwas na sa peligro si Luang ug kasamtangang nagpaayo sa tambalanan. / celr