With all due respect sa atong Cebu City Fire Marshal nga si Chief Insp. Rogelio Bongabong Jr, medyo uwahi gyud ang ilang kasayuran kagahapon sa labing unang alarma sa sunog niining pag-obserbar sa Fire Prevention Month 2014.
Among mga kauban nga didto sa downtown nga nakakita sa itom kaayong aso maoy nanawag sa among newsroom.
Dihang among gitawgan ang 160 gitubag mi sa operator nga negative. Buot ipasabot nga way sunog. Pagkapait kun ingon ani pirmi nga maulahi ang tag-Bureau of Fire Protection (BFP).
Abi man gud nako nga kanunayng alerto ang atong mga bombero.
Nangatug ang taga-BFP? Dako ning insulto ni Philip Tan nga maoy tag-iya sa nasunog kinsa president sa Mandaue Chamber of Commerce.
* * *
Kun tinuod nga drug lord ang utok sa pagbanhig patay nila ni manlalaban Noel Archival, samot na gyud kalawom ang pagsulbad ning maong krimen.
Kay daghan nang patay nga drug lord maoy gipasanginlan apan way bisan usa ka drug lord ang gitaral.
Miangkon na si Senior Supt. Noel Gillamac, Cebu Provincial Police director nga naglisud gyud sila sa pagsulbad sa maong krimen.
Pero kun tinuod nga drug lord, unsa may rason nga masuko ni Archival nga siya man maoy tiglaban sa ubang mga dinakpan nga mga drug pushers?
Gipagawas kining maong speculation aron mosamot kalawgaw kining maong kaso?
Akong sublion akong panawagan sa kapolisan nga di gyud magpasagad og pamasangil ngadto sa mga inosente.
Kay anaa ang legal maxims nga nagkanayon nga mas maayong molibre ang korte og napulo ka mga tinuod nga responsable sa krimen kay sa mokonbikto og usa ka inosente.
* * *
Pormal na gyung gi-file kagahapon didto sa Regional Trial Court (RTC) Criminal Division sa may Qimonda IT Center ang kasong murder batok niadtong mga security guard sa
Gaisano Metro Colon nga sila si Mauricio Doblados Jr ug Jeffrey Aquino nga mikulata-patay ni anhing Mario Alfie Ducayag niadtong Abril 12 sa miaging tuig.
Way piyansa alang sa duha ka akusado tungod kay murder ang asunto basi sa information nga gihimo ni Prosecutor II Annalou Fernandez Cavada ug Cebu City Prosecutor Nicolas Sellon.
Pero ambot lang kun anaa pa ba dinhi sa Sugbo sila si Doblados ug Aquino.
Si Doblados wa gyud moatubang namong mga sakop sa media sukad mibuto ning maong isyu.
Sulagma nga naka-file photo ug video ang mga tigbalita kang Aquino dihang nasikop kini sa kapolisan kaniadto.
Bugtong si Melvin Boyles sa tulo ang wala maapil sa kaso kay way ebidensiya. Apan importante ang iyang testimony sa kaso sumaa ni piskal Sellon.
Pero unsa kahay mahitabo ning maong kaso kun pasibaton si Boyles ug mag-iyahay na og pamakak sila si Aquino ug Doblados?
Dili kaha paingon sa pagkainutil ang pagpangayo og hustisya sa pamilyang Ducayag?
Si Aiko Ducayag, igsoon ni anhing Mario Alfie sa iyang text miingon nga “Our family hopes that there will be no more delays, cover-ups and manipulations to our case. Let the truth come out and justice [be] served to my brother.”
Way nahibaw-an ang pamilya kung asa gyud si Doblados apan may kasayuran sila sa whereabouts ni Aquino.
Maglaum ko nga di maglangay ang korte pagpagawas og warrant of arrest batok nilang Aquino ug Doblados aron pangdakpon ug sugdan dayon ang trial on the merits.
* * *
Nahimong tensiyonado kagahapon ang pagsugod na og guba sa gatusan ka mga panimay sa sitio San Miguel, barangay Apas ning dakbayan.
Naglumba sa pagpanghilak ang mga apektadong residente dihang usa sa mga panimay ang gisugdan og guba.
Si Judge Alexander Acosta sa Regional Trial Court 9, misalindot sa gipangayong restraining order sa mga nagpuyo kay wa maapil ang Metropolitan Trial Court in Cities Branch 6 court sheriff Edilberto Suarin.
Gawas pa napakyas ang mga nagpuyo pagbutang og supersedes bond nga maoy motubag kun dunay danyos sa dili pag-demolish.
Apan nasuspenso ang pagpangguba kay nahangyo ni kapitan Ramil Ayuman ang sheriff nga isuspenso lang una samtang i-comply nila ang mga kamandoan sa husgado.
Ilang gihangyo si Gov. Hilario “Junjun” Davide III nga mo-intervene gyud kay nagtuo sila nga dili kini iya ni Aletha Suico-Magat ang lote kun dili iya sa kagamhanang probinsiyal.
Pero ipadayon karong alas-8:30 sa buntag ang demolition.
Manghinaut ko nga maresolbar kining maong isyu sa korte.
Nganong gitayming man sab ni nga ting-eskuwela pa man?
* * *
Unsa na man sab ang motibo sa pag-ambush kang Claudio barangay captain Alexander Alquisa ug sa iyang ka live-in partner nga si konsehal Irene Wamilda sa dakbayan sa Toledo?
Love triangle? Negosyo? O ba kaha may kalambigitan sa iyang pagkiha sa ilang barangay treasurer?
Patay ang konsehala sa maong pagpang-ambush samtang critical pa ang kapitan.
Si Chief Insp. Michael Bastes naglabad sab ang ulo sa pagsulbad ning maong krimen kay way nakaila sa mga responsable nga gituhoang mga guns-for-hire.