CEBU CITY, Philippines — Sangko sa langit ang pagmahay sa usa ka 24 anyos nga lalaki human kini nadakpan sa kapulisan nga mihatud og ginadiling drugas pasado alas 11:00 sa kagabhion, Abril 4, 2019.
Si Ryan Cabase, lumulupyo sa sitio Ija, Barangay Guadalupe, syudad sa Sugbo, nadakpan human masakpan nga naggunit sa 50 gramos nga shabu nga paliton unta sa mga nagpailang buyer.
Ang pagpang-ronda kagabii sa maong dapit gipanguluhan ni Lieutenant Colonel Glenn Mayam, hepe sa Drug Enforcement Group (DEG) Visayas, ug mga sakop sa Guadalupe Police Station.
Nagkatindad og P340,000 ang 50 gramos nga shabu base sa Dangerous Drugs Board value niini.
Matud ni Mayam, nga nakighinabi sa CDN Digital, makontak si Cabase pinaagi sa text message aron mohatud sa ilegal nga drugas sa iyang mga parokyano.
Iya kining gibuhat aron dili mahibaw-an sa iyang masakiton nga inahan.
Matud ni Cabase, trabaho na niya sauna pa ang paghatud og ginadiling drugas apan miundang siya human gibadlong sa iyang kapuyo.
Iyang giangkon nga kagabii lang sya nibalik sa maong trabaho tungod kay adunay mga parokyano nga nihangyo kaniya.