Unsa man gyud ang hinungdan nganong gi-ilisan ni Cebu Governor Hilario Davide III si Neil Angelo Sanchez kang Baltazar Tribunalo pagka hepe sa Provincial Disaster Risks Reduction and Management Office (PDRRMO)?
Gumikan bas pulitika tungod kay si Sanchez natudlo panahon pa ni kanhi Governor Gwendolyn Garcia?
Pero kung pulitika man, nganong gitugtan man siya nga makapadayon ug trabaho sa Kapitolyo niadtong nahimong Acting Governor si Vice Governor Agnes Magpale nga ang naulahi kaalyado man sa gobernador?
Karon pa nasakpan ang tinuud nga kolor sa pulitika ni Sanchez?
O ba kaha dunay mga opisyales sa Kapitolyo nga nangasuya ni Sanchez dihang siya maoy mo-atubang sa mga sakop sa media sa panahon sa mga kalamidad sa miaging tuig?
Wa kaha siya mabiktima sa intriga sa mga ladhan ug dila diha sa Kapitolyo?
Si Neil Sanchez nga akong na-interview sa akong programa sa DYSS Super Radyo pagkuha sa iyang reaction sa migawas nga balita nga siya pulihan, wa siya maglangay sa pag-angkon nga gi-estoryahan siya ni Governor Davide niadtong miaging Lunes (March 3, 2014) nga siya relibohan human sa ilang flag raising.
Nakabuhi sab ug mga pulong si Sanchez niadtong higayuna nga andam niyang biya-an ang Kapitolyo kana kung ibutang siya sa departamento nga wa siyay na-antigohan ug dili siya epektibo kay matud niya sayang lang ang gi-suweldo ni Juan Dela Cruz nga modawat siya ug puwesto nga way kabangka-agan.
Giklaro sab ni Sanchez nga ang paghulip kaniya dili sa ingon nga dunay binuang sa pundo sa iyang buhatan ug matud niya nga maka-liquidate siya sa tanang gasto sa iyang gihuptan nga opisina.
Sa tinuud lang akoy gisayangan ni Sanchez nga mawala sa Kapitolyo kay nasayod ko sa iyang expertise sa emergency response ug kugihan sab nga motrabaho ug makamao sab siya.
Mao nga ako siyang gitambagan nga pugngan sa niya ang iyang plano pagbiya sa Kapitolyo. Misanong siya sa akong tambag ug gani misugyot pa ko nga himoon nalang siyang Deputy Chief kang Tribunalo.
Apan nanggawas ang balita niadtong Biyernes sa iyang Facebook account nga mobiya gyud siya sa Kapitolyo sa umaabot nga mga buwan kay mo-concentrate sa iyang gamay nga negosyo human nga gi-ataki siya ni Leo Lastimosa.
Hinoon simple raman ni’ng ako nga kung di kadawat si Neil sa mga pagsaway sa media wa siya’y luna sa government service. Kinahanglang dili gyud onion-skinned ang mga mangalagad sa katawhan.
In fairness niya, dili ko mauwaw moingon nga daku siya’ng asset sa Kapitolyo ug sa gobyerno.
Kung pulitika man gyud ang hinungdan niining tanan, makaingon sab ko nga wa sab gyu’y ayo.
Kanus-a pa man mahimong responsable atong mga politiko nga pangyatakan ra man ang mga tawo nga makama-o sa trabaho.
Kung biktima man gyud si Sanchez sa pulitika way kalainan sa ubang mga job order employees sa kalungsuran nga gigastohan na sa gobyerno sa insaktong budget pag-training alang sa search and rescue ug ubang emergency response unya takulahaw lang nga ilisan sa bag-ong namunu-an sa mga way alamag.
Dili ba kini usa ka matang sa pag-usik-usik sa kuwarta sa kagamhanan? Matuwid na daan gihapon ni?
* * *
Makapamikat man sab ko ug ahat niining atong mga kadagkuan sa Cebu City Hall pinangulohan ni Cebu City Mayor Michael Rama kay wa gyu’y consistency pag-implementar sa mga balaud.
Karong bag-o gi-estrikto na sab ang “no segregation, no collection policy” sa mga basura, pagpasagad ug labay niini, pagpasagad og pagpangihi ug sa pagpaguyod sa mga sakyanan nga gipatakaan lang pag-parking sa mga tag-iya diha sa kadalanan.
Hangtud kanus-a man kutob ang dinakpanay sa mga malapason? Undangon na sab ni inig hapit na ang 2016 Presidential and local elections?
Kini’ng pagka-“ningas cogon” sa implementation maoy hinungdan nga dili gyud madesiplina ang katawhan.
Sila si Grace Luardo sa CESET ug Rollie Ardosa sa DPS nanghambog niadtong Sabado sa among programang “Dialogue On The Air” nga wa na gyu’y pasayloon bisag mga kaalyado pas pulitika ni Rama.
Kay gani matud nila dunay 43 ka mga loader ug driver ang silotan pinaagi sa community service human mi-kolekta sa mga basura bisag wala mabuwag ang malata ug di-malata.
Pero akong tan-aw drama ra kini. Unya nalang ko modayeg nila kana kung makapatuman sila sa hingpit sa mga lagda niining maayong kampanya sa paghipos sa mga basura.
* * *
Nahurot akong bilib sa ka lig-on sa combined team sa Sunstar Daily ug Brigada News sa Newsmen Basketball Association (NBAC) kay bisan lima ra sila ka buok milampos sila pagpilde sa kompletong grupo sa CCTN-47 kagahapon sa buntag diha sa Cebu Eastern College (CEC).
Sila si Philip Cerojano ug Johnly Bayking maoy mga top scorer. Gani ila pang gilubong ang CCTN sobra napulo sa 1st ngadto sa 3rd quarter.
Naninguha ang CCTN pinangulohan ni Rodel Quimod nga makabawi pag-4th quarter apan wa gyud sila makadepensa sa duha ka mga players taliwa nga nag-abot na ang ginhawa.
Again, daghan gyud kaayong salamat nila ni Sir Chester Cokaliong sa Cokaliong Shipping Lines, Sir Jefferson Go, Sir Sammy Sia, Sir John Maraat ug sa tibuuk management sa CEC sa way putol nilang suporta namong mga tigbalita.