Niadto pang Biyernes sa gabii nakadawat nako og mga impormasyon nga duna nay mga dinakpan nga gi-ingong mga responsable sa pagbanhig nilang manlalaban Noel Archival.
Apan way mikompirmar sa Task Force Archival bahin sa impormasyon.
Gani sa unang info anaa na ubos sa kustodiya sa National Bureau of Investigation (NBI) ang mga dinakpan. Apan gihimakak sa mga operatiba ang balita.
Niadtong Lunes nga miasumer ang bag-ong NBI regional director nga si Max Salvador, daling nagpasiatab nga masulbad na nila karong semanaha ang kaso.
Pero kun tinuod nga masulbad na nila ang kaso, labing maayo. Ambot lang kun di ba lang kutob sa pagarpar?
Maglaum lang sab ko nga ang gitutokan nilang mga suspect mao gyuy mihimo sa krimen.
* * *
Akoy naluoy sa mga graduating students sa Talisay City College (TCC) kay maoy naipit niining pag-inilogay sa puwesto nilang Richel Bacaltos ug Dr. Paulus Mariae Cañete pagdumala sa TCC.
Makalibog kun kinsay tumanon. Si Bacaltos maoy nakauna pag-schedule sa graduation karong Abril 11 apan niadtong Lunes si Cañete kinsa unang mi-uyon sa Abril 11 nga graduation mipagawas og iyang laing schedule nga karon nang March 31.
Dunay mga tinun-an nga nanaglumba paghilak kay sila maoy alaut ug mahasol. Karon pa ko makadungog nga kaduha mopaso ang mga tinun-an.
Alang nako, si Regional Trial Court (RTC) Judge Estela Alma Singco ray makasulbad niini nga di intawn magkayagaw. Pero mipasabot ang huwes kagahapon nga dili siya makapadayon og hearing sa injunction kay dunay motion to dismiss ang kampo ni Cañete.
Wa sab mokomentaryo ang huwes kun angayan bang motambong ang mga tinun-an sa duha ka schedule nga graduation.
Usa ra gyud ka tawo ang hinungdan ning tanang kagubot sa TCC ug way lain mao si Mayor Johnny Delos Reyes kinsa pataka lang og tudlo ni Cañete nga kwestiyonable na daan didto sa Mandaue City College.
Kun inutil ang korte, kinahanglang mo-intervene niini ang Commission On Higher Education in Central Visayas aron mahiluna intawn ang mga estudyante.
* * *
Subo kaayong palandungon nga nagubot ug dunay nahitabong lamok-lamok sa duwang football tali sa Alcoy Football Club ug Ateneo de Cebu niadtong Domingo.
Ang nakaporke kay dunay mga ginikanan nga nag-apil-apil sa away-bata ug mao gyuy nangunay sa pagpamun-og.
Maglaum ko nga maimbestigahan kini ug manubag kadtong mga responsable sa lamok-lamok.
Ambot lang kun unsa katinuod nga sa wa pa ang sangka, nahagit ang taga-Alcoy dihang giingnan sa taga-Ateneo nga way luna ang taga-bukid sa matang sa paugnat sa kusog.
Kun tinuod man, akoy naluoy sa taga-amo nga silingang lungsod nga gibiay-biay intawn.
Sigurado ko nga mag-abot ra gihapon sa korte kining maong isyu kay magkinihaay man kaha sila.
* * *
Nakasabot gyud ko sa reklamo nilang Sir Chester Cokaliong sa Cokaliong Shipping Lines ug sa tanang mga negosyante nga apektado ning pagsira sa dalan S. Osmeña Avenue diha sa may North Reclamation Area.
Dili ba pwede nga itagi-tagi ang pag-ayo unya pikas lane lang ang sirad-an?
Hasol gyud kaayo alang sa tanan bisan ang mopaingon sa Qimonda IT Center nga anaa karon nahimutang ang korte sa dakbayan sa Sugbo.
Hasol na man gani kaayo sa mga motorista kining pag-guba sa mga karaang aspalto nga daw samag agi sa kinan-an og kagang nga pwerte gyung laksota.
Daghang gianugnan niining pagsigeg pangguba sa dalan kay bisan maayo pa giguba gihapon samtang daghang mga kalsada nga dagko na kaayo og libaong apan wa gyud ayoha. Ug daghan pang mga kalsada nga wa gyud gani ma-aspalto.
Kagahapon, akong gituyo pag-adto ang lugar ug medyo huot-huot gyud sa traffic diha habig sa Cokaliong Tower.
* * *
Congratulations sa duha ka mga estudyante sa abogasya sa University of San Carlos (USC) ug University of Cebu nga mi-top 5 ug 6 sa Bar Examinations nga sila si Tercel Maria Mercado Gephart ug si Manuel Sarausad.
Si Judge Singco nga nagtudlo og political law sa USC miingon nga maayo gyud kaayo sa klase si Tercel.
Nahibawo-an nga ang passing percentage sa USC moabot ug 81.03 percent or 47 out of 58 sa mi-take maoy nakapasar.
So, congrats sa tanang bag-ong abogado!