Dalaygon ang Dios!

Salamat sa Ginoo nga na Santos na gyud kagahapon ang akong gi-idolo kaniadtu nga lider sa Simbahang Katoliko nga si Pope John Paul II uban kang Pope John XXIII.

Alas 4:15 kagahapon sa hapon pormal nga gideklarar ni Pope Francis ang ilang pagka Santos atul sa canonization rites sa ilang mga relics. Mismong dugo ni Pope John Paul II maoy iyang relic samtang panit sa lawas kang Pope John XXIII.

Pagkanindot unta nga daghan kitang matakdan sa ilang pagka-buotan niining panahon karon nga usahay dili na gyud masabtan.

Pagkadaku diay sa papel ni Pope John XXIII sa atong Simbahan kansang patay’ng lawas wa pa madugta hangtud karon kay siya maoy naka-ingon nga gihubad ngadto sa lain-laing pinulongan ang Santos Nga Misa nga kaniadtu gamitan lang ug “Latin”.

Sa among coverage kagahapon sa GMA News TV, napuno sa mga pilgrims ang Saint Peter Square sa Vatican City sa Roma.

Pagkadaghan na gyud diay sa mga Santos nga gideklarar sa Simbahan kay mi-abot na ug sobra 10 mil.

Maglaum ko nga daghan pa kitang ma Santos sa atong panahon. Amen!

* * *

Sa akong basa medyo duol sa tinuud ang migawas nga estorya sa usa ka nasudnong mantalaan bahin sa giingong affidavit ni Janet Lim Napoles nga nagtumbok sa mga cabinet members ni Presidente Noynoy Aquino ug sa 12 senators nga nalambigit sa multi-billion pork barrel fund scam.

Makaingon ko nga duol sa tinuud tungod kay dunay duha ka mga dagkung opisyal sa Aquino administration ang gitumbok nga apil sa anomaliya nga sila si DBM Secretary Butch Abad ug Sec. Proceso Alcala. Si Abad maoy giingong nag-una sa listahan.

Pero ambot kung unsa gyud ang tinuud, kay sa unang estorya, 19 ka mga senador ang involve.
Haskang paeta kung tinuud man kini.

In fairness hinoon sa mga giingong apil sa listahan, daan nang midepensa nga wa gyud silay labot sa anomaliya, sila si Senador Alan Peter Cayetano, kanhi Sen. Manny Villar, Sen. Loren Legarda, Sen. Lito Lapid, Sen. Francis Escudero, Sen. Tito Sotto, Sen. Franklin Drilon, Sen. Miriam Defensor-Santago, Sen. Pia Cayetano, Sen. Jinggoy Estrada, Sen. Ramon Revilla ug Sen. Juan Ponce Enrile.

Sa The Daily Tribune nga publications gitumbok ni Napoles si DBM Sec. Abad nga maoy iyang “tutor” sa pork barrel scam ug maoy nagtudlo kung unsaon pagpalapad ang iyang “scam business”.
Nagtoo ko nga partial pa kining info nga nakuha sa maong mantalaan ug possible pa nga duna pay daghang apil sa anomaliya.

May ponto man tuod si Sen. Drilon nga puwedeng gamiton sa pamulitika ug pangdaut nilang mga inosente ang listahan ni Napoles apan kinahanglang matribukar gyud ang tinuud aron ang lungsod nay mohukom kanila gawas sa pagtaral kanila.

* * *

With all due respect sa mga beach resorts owner didto sa isla sa Malapascua, Daanbantayan ug sa mga opisyales sa gobyerno, sayop gyud ning ilang desisyon nga disarmahan ang mga guwardiya nga mo-duty subay sa nahitabong pagpatay sa British national.

Risgo kaayo kining ilang desisyon kay simbako ug dunay mga dautang elemento nga mohimog krimen sa mga local and foreign tourist kutob rang mamikat ang mga security guards. Unyag mahitabo nga dunay grabeng krimen ug palpak ang ilang security plan, armasan na sab ang mga guwardiya?

Dili kaha hinoon mosamot ang krimen ug dunay mga local boys nga sayon rang makasud kay wa nay armas ang mga security guards?

Akong gisuportahan ang baruganan sa kapolisan nga usa lang gyud ka isolated case ang nahitabo sa langyaw ug sa guwardiya nga taga Leyte.

Dili sa ingon nga ni-uyon ko sa gihimo sa guwardiya, apan ang mas labing sayon nga himoon nilang Vice Governor Agnes Magpale ug Governor Junjun Davide mas maayong sutaon nila kung kining mga guwardiya nga gihire sa mga agency kuwalipikado ba gyud ug miagi ba sa insaktong training o ba kaha pinalusot lang.

Gawas niini, kinahanglang sutaon kung insakto ba ang benepisyo sa mga guwardiya ug nahatagan ba ug kaangayan basi sa atong labor laws.

Ang kaangayan ug paghatag ug insaktog tratamento ni bisan kinsa ilabina sa mga guwardiya dili gyud makapasipok sa ulo. Makapasamot hinoon kini sa loyalty sa guwardiya ngadto sa amo.

Wa koy supak nga magbutang ug PNP outpost sa atbang sa isla sa Malapascua ug dunay mga pulis ug mga barangay tanod apan dili sab maayo nga taga gobyerno gihapon ang ilang gamitong pang-internal security sa lain-laing resort aron dunay counter-checking.

* * *

Wa nako ma-shock nga gi-absuwelto sa Court of Appeals Cebu Station sila si kanhi Governor Gwendolyn Garcia ug kanhi Provincial Board Member Juan Bolo sa kasong administratiba (grave misconduct) sa ilang kontrobersiyal nga pagpalit sa Balili property nga sagad parte niini lubog sa tubig dagat.

Nakalingkawas sila tungod sa “Aquinaldo doctrine” ug sa ubang jurisprudence sa Korte Suprema nga nagpasabot nga automatic nang i-absuwelto sa kasong administratiba ang usa ka elected public official kung subli-on siya pagpili sa katawhan kay nagpasabot nga ang pagka-pili ug usab nagpakita nga gipasaylo siya sa katawhan sa mga nahimo niyang kasaypanan sa miaging termino.

Sa kaso ni Bolo wa na siyay tulubagon kay wa naman siya magpapili ug wa siyay gihuptan nga puwesto sa gobyerno.

Pero sama sa gipasabot ni Executive Justice Gabriel Ingles dili kini maka-apektar sa criminal aspect nga gi-atubang nilang Garcia sa Sandiganbayan.

Ang posibleng rason nga makapa-absuwelto nilang Gwen sa Sandiganbayan mao nga titulado ang lote sa mga Balili.

Pero dili lang kining maong isyu ang tan-awon sa korte lakip na ang nahitabong over pricing, way public bidding, ang urgency sa pagpalit bisan way availability of funds ug ang kapakyas sa pagsusi sa tinuud nga kahimtang sa lote.