Ang paglubay-lubay sa baruganan sa atong mga local officials dinhi sa Sugbo pag ban sa mga Chinese tourists/nationals/travelers bisag anaa na sa epidemic level ang 2019 novel coronavirus, maoy timailhan sa huyang nilang liderato.
Maanaa ug way gahom pag ban sa entry sa mga pasahero gikan sa mainland China, ang importante nga hugtanon unta nilang ipaabot ni Presidente Duterte ang lanog nga baruganan sa mga Sugbuanon nga mao ang pagpatuman og total ban.
Nagpa sipsip gihapon sa national government bisag nabutang na sa peligro ang katawhan?
Kining ipatuman ni Governor Gwen Garcia nga 14 days quarantine sa mga Chinese nationals ug ubang tawo nga gikan sa China, ilabina sa Wuhan City, naghatag lang kini kanila og dakung labad ug kahasol kay sayod ko nga di gyud kaya.
Tiaw muna matud pa ni Lapu-lapu City Mayor Ahong Chan nga mo-abot diay og 36 ka mga flights matag simana diha sa Mactan gikan China. Asa man nato sila ipahimutang? Adto sa mga provincial ug district hospitals? Or abangan nato ug pakan-on sa mga hotels?
Pagka hasol aning kahimtanga! Dunay sayon nga mao ang pag ban. Kinahanglang mosabot sab ang mga Chinese nationals niini kana kung tinuud nga amigo ug kaalyado ta nila.
Kung mangusog atong mga local leaders pag ban, segurado ko nga mosabot si Presidente Duterte ug ang kagamhanan sa China tungod kay isyu intawon kini sa pang lawas.
Layo ra gyud ta sa Russia ug United States of America nga mi-impose na og total ban.
Sa sitwasyon karon nga misamot na kadaghan ang nataptan, butang kini nga lig-onon na ang baruganan sa atong mga opisyales.
Pag sure na mo diha intawon kay sa pagsuwat nako ning maong lindog kagahapon nagsigeg saka ang figure.
Miabot na og dul-an 12 mil ka tawo ang nataptan samtang misaka na og 259 ang nangamatay.
Karon gani nga usa pa kaso ang confirmed dinhi sa Pilipinas nag panic naman gani ang mga tawo. Unsa na kaha kung kining maong gidaghanon mahitabo sa Pilipinas ug sa Sugbo?
* * *
Nakuhaan ko’g usa ka loyal ug avid fan sa akong radio program matag gabii sa DYSS Super Radyo human gikuha sa atong Labaw’ng Makagagahum si Sir Dionisio Chiong Jr. niadtong Domingo sumad karon.
Akong nahibaw-an ni Ma’am Thelma nga masuko gyud to kung ibalhin ang dial sa iyang radyo o ba kaha pagngon ang radyo. Pirme gyud to siya mo participate sa akong programa pinaagi sa pag text sa iyang mga baruganan sa mga isyu ug mga mahinungdanong mga impormasyon.
Nagka-ila mi ni Sir Dionie sukad pa niadtong 1997 human nabiktima iyang mga dalaga sa linoog nga krimen nga sila si Marijoy ug Jacqueline nga gipangkidnap, gi gang rape ug gipang patay sa mga sentensyadong suspek nga sila si Paco Larrañaga, Josman Aznar ug mga kauban.
Gi-cremate siya niadtong Biyernes diha sa Saint Peter Imus nga gitambungan sa mga miembro sa Crusade Against Violence ug sa mga pamilya niadtong mga biktima sa linoog nga krimen.
Ayo-ayo sa pagpanaw Sir Dion!