Kung nahigugma gyud si Police Major Ildefonso Miranda, hepe sa Argao Police Station, ngadto sa usa ka detainee nga si Jean Villanueva taga Barangay Casay sa lungsod sa Dalaguete, iyang ipatigbabaw ang ilang relasyon taliwa sa mga babag ug bisan pa ang kalibutan magdumili.
Lisud kung gugma nay magdektar kay dili ilhon ang pagkatawo sa magkahigugmaay bisag unsa kadautan.
Way legal impediments kay ulitawo man kaha si hepe unya ang babaye single mom.
Apan kung igo ra’ng gipahimuslan ang lawas ni Jean nga nag-atubang og kaso sa illegal drugs ug nakig-anib na si Major Miranda sa mga durugista, butang kini nga angay’ng tutukan sa liderato sa PNP.
Tinuud daghan kaayong mga detinado karon nga mga guwapa nga makapatintal gyud nga nalambigit sa illegal drugs.
Mao nga makapangutana ko, sa Argao ra kaha ni nahitabo? Sa pulis ra kaha ni nahitabo? Sa Bureau of Jail Management and Penology (BJMP)?
Kaniadto pa ning isyuha nga dunay mga pulis gipangreklamo sa ilang mga dinakpan nga mga commercial sex workers nga mopahimulos gyud.
Kudos sa atong taga PNP Regional Intelligence Branch ug sa mga personnel sa IMEG (Integrity Monitoring and Enforcement Group) nga milampos sa ilang pag-ronda sa hepe sa Argao.
Wa kaha himo-ang motel ni Miranda ang Argao Police Station? Unsa may gihimo nila sa sud? Nagrosaryo?
***
Gitukod na MILO
Tungod sa pamulitika ni Cebu City Mayor Edgardo Labella mapugos na lang og pabaga sa iyang nawong ug antuson ang bisan unsang mga pagsaway sa publiko niining iyang pagtukod sa MILO o Mayor’s Information and Liaison Office sa matag barangay dinhi sa dakbayan sa Sugbo.
Wa gyu’y kalainan sa BMO o Barangay Mayor’s Office ni kanhi Cebu City Mayor Tomas Osmeña kining MILO ni Labella.
Gisaway pag-ayo ni Labella ang BMO kaniadto pero karon iyang gikopya.
Bisan unsaon nako pagbasa, ma BMO o ma MILO man pero moluta gyud sa unahan nga ang trabaho niini klaro kaayo nga duplication ug pangilog sa duties and functions sa kapitan sa barangay.
Ginindot lang ni Labella ang iya kay tanang barangay iyang gi-apuran sukwahi niadto kang Osmeña nga kadto ra’ng mga barangay nga diin ang kapitan kontra partido ang iyang gibutangan og BMO personnel.
Akong tan-aw makamugna kini’g away sa ilang mga kapartido mismo kay ma-insulto baya ang ilang kaalyado nga kapitan nga gibutangan pa’g MILO.
Dili malikayan nga motumaw ang mga pagduda nga way salig si Labella sa ilang katakus ug loyalty pun-an pa ni’ng ilang bingkil ni Vice Mayor Michael Rama.
Pangandam na gyud ni kang Labella sa 2022. Makasabot ra sab ko kay milikoy naman ron sila Rama ug mga kauban.
Dawaton na lang gyud sa publiko nga mao ni ang reyalidad sa pulitika.
***
Sugal sa bilar
Maayo kay giklaro si Cebu City Police Office director, Colonel Engelbert Soriano, nga dili nila dakpon kadtong magduwag mahjong (pitsas) o baraha atol sa pagbilar og minatay basta wa silay makit-an nga pusta.
Di sab nila dakpon kadtong mag-inom ug magtagay sa vicinity sa private property sa namatyan. Ang dakpon kadtong naa sa pampublikong lugar sama sa common nga agi-anan.
Pero nagkatawa lang ko sa ponto ni Soriano parte sa sugal kay ang mga sugarol maayo kaayog mangitag paagi nga malutsan ang atong mga otoridad.
Gipasalig hinoon ni Soriano atol sa among programa’ng “Dialogue On The Air” sa DYSS Super Radyo nga mangita sab silag paagi pagsakop sa mga magsugal atol sa bilar.
Akong sublion nga alang nako dili na gyud nila angay’ng daginoton ang mga sugal sa kinamatyan kay kini maoy nagdalag alegre ug makatabang kini sa mga namatyan kay maka-income man ang pamilya pinaagi sa pagkalas.
Akong nahibaw-an nga mohangyo pa gani ang kabanay ngadto sa nag-serbisyo nga funeral parlor nga ilangay-langay ang paglubong aron maka-abot ang kalas sa ilang obligasyon sa paghipos sa minatay./dbs