Ang kanhi officer in charge sa Provincial Social Welfare and Development Office kon PSWDO sa Kapitolyo nga si Evelyn Senajon nakig-istorya kanako personal niadtong Miyerkules sa hapon ug miesplikar pag-ayo nga wa gyuy tinunto kadtong iyang pagpalit sa mga sardinas nga “King Cup” nga mikantidad og P5 million nga gihinabang sa mga biktima sa bagyong Yolanda didto sa amihanang Sugbo.
Mao nga pagkagabii atol sa akong programa sa dySS Super Radyo/GMA, ako siyang gi-interview pagbalik aron makatubag sa ubang mga isyu nga gipasangil batok kaniya.
Iyang giklaro nga way malisya ug way dautang intensiyon ang iyang pagpa-deliver dayon sa supplier sa sardinas bisan wa pay approval gikan sa Bids and Awards Committee (BAC) tungod kay dinalian gyud kaayo aron kuno makahatag dayon ang Kapitolyo ngadto sa mga biktima sa bagyo.
Apan ang akong nalibgan kay miingon siya sa on-the-air nga ang purchase request (PR) gipadagan sa wa pa nahitabo ang bagyong “Yolanda.” Buot ipasabot nga dili dinalian ug kinahanglan pa untang moagi sa public bidding ug comprehensive canvass.
Pun-an pa nga miboluntaryo siya pag-ingon nga duna pay insaktong supply sa sardinas nga “Tosen” nga naka-stockpile nga pinalit sa iyang gisundan nga PSWDO officer nga si Marivic Garces.
Hinoon, iyang gipasabot nga nagdali-dali siya sa “King Cup” nga maka-supply kay ilang nakonbise uban ni Dumanjug Vice Mayor Efren Guntrano Gica ang supplier nga tag P13 kada lata nalang gikan sa tag P13.50 ug aron idugang sa pundo nga stock.
Pero nahibawo-an nga sa canvas sa Provincial General Services Office (PGSO) ang brand nga “Tosen” nga suki ni Garces mobalor lang og tag 12.50 basi sa dokumento nga naandam kaniadto ni PGSO Officer Eva Encabo.
Apan giklaro ni Senajon nga kadtong maong quotation nga nakuha ni Encabo dili kadto mahug nga formal canvass kay medyo daan na kadto.
Apan naglibog lang ko og samot ni Senajon kay miangkon siya nga tag P12.50 sab ang hatag sa taga “Tosen” pero diha na misugot nga naka-deliver na ang supplier sa “King Cup”.
Nahibawo na man siya nga dunay barato apan nganong wa man siya magpa-deliver sa taga “Tosen”?
Simple ra gyud ning akong analysis nga sa tumang dali-dali ni Senajon maoy hinungdan nga nabuwasot siya. Kun nakakuwarta man siya sa P5 million sama sa pagtuo sa uban, manubag siya niadto.
Laing gipasabot ni Senajon nga dili gyud tinuod nga dunay mga imported goods nga hinabang gikan sa gawas nga nangabaho lang kay ang tanan ila gyung nahatag ngadto sa mga biktima apil na ang mga napalit nga mga sardinas ug bugas sa panahon ni Garces.
Wa siyay gilubong nga mga de lata ug mga bugas.
Samtang kabahin sa mga multi-vitamins nga hinatag gikan sa mga botika nga hapit na ma-expire atol sa pagpanghatag, gipasabot ni Senajon nga dili kadto makadaot sa mga bata kay mismo iyang mga kailang doctor miingon nga ang vitamins dunay duha ka buwan nga lugway gikan sa iyang expiration.
Laing butang nga giklaro ni Senajon sa among estoryahanay nga dili intawon siya sugarol.
Giangkon niya nga dunay kausa nga miadto siya sa casino ug miduwa sa slot machines apan atol kadto sa pag-abot sa iyang anak nga usa ka seaman nga gustog lingaw-lingaw.
Tinuod nga nakapalit siya og petsas sa mahjong apan way gamit ug igo rang kalingawan sa pamilya.
Pero unsa katinod nga dunay 11 mil ka mga sinakong bugas nga gipalit kaniadto ang Kapitolyo panahon ni Garces nga unfit for human consumption?
Matud pa gibalik-balik paggaling ang bugas makatulo ka higayon apan hagbong gihapon sa test kay taas kaayo ang toxicity level?
Panahon na siguro nga imbestigahon sa Commission On Audit ang PSWDO Capitol aron maklaro kun wa ba maglumba sa paghimog mga tinunto ang mga nagdumala kaniadto.
Pagkasakit paminawon nga dunay daghang tiyan nga nagkutoy sanglit dunay mga mapahimuslanon nga opisyal.
* * *
Daghan kaayong salamat kaninyo among mga suking tigpaminaw sa dySS Super Radyo kay no. 1 na sab ang akong programa nga “Lloyd Suarez On Board Saksi” basi sa pinaka-latest nga survey sa 1st quarter niining tuiga sa Nielsen Media Research Radio Audience Measurement Metro Cebu nga gipahigayon niadtong Feb. 27 to March 5, 2014.
Sama sa miaging mga survey dili gyud malalis nga ang akong programa consistent nga no. 1 nga magsugod alas-9 sa gabii ngadto sa alas-11 nga maoy nanganaw-kanaw sa kahanginan dinhi sa Sugbo lakip na sa ubang parte sa Kabisay-an ug Mindanao.
Maayo na lang nga pinaagi ning maong survey makapagana kanakog samot ug di magkawang ang akong mga paningkamot, paghago-hago ug pagtukaw gikan sa Lunes ngadto sa Biyernes uban sa mga dagkong isyu nga may labot ang lungsod.
* * *
Grabe gyud ka kulbahinam ang championship game namo kagahapon sa GMA-7/dySS Super Radyo batok sa taga TV-5 didto sa Cebu Eastern College (CEC).
Kaduha mag-overtime og tag 5 minutes unya ang final score 101-102. Natural, kami sa Kapuso Network maoy midaug.
History kini sa Newsmen Basketball Association of Cebu (NBAC) nga ang GMA-7/dySS Super Radyo milampos pag grand slam sa ikatulong higayon nga buot ipasabot ikasiyam na namong pagka-kampiyon sukad natukod ang NBAC namong mga tigbalita.
Again, daghan kaayong salamat sa mga misuporta sa among liga nga ang tuyo paugnat ra gyud sa kusog namong mga tigbalita sama nilang Sir Chester Cokaliong sa Cokaliong Shipping Lines, nilang Sir Jeff Go ug Sir Sammy Sia mga executive board sa CEC, ingon man ni Sir John Maraat nga sports coordinator ug property custodian sa CEC ug ilabina sa among BAC commissioner nga si Sir Bobby Inoferio.