Hagoka gyud kaayo ang atong mga front line agencies nga maoy gitahasan sa pagpakig-batok sa mga anomaliya sa gobyerno sama sa Ombudsman, Commission On Audit (COA) ug uban pa.
Dinhi lang sa ato, murag nagpakabuta-bungol kining mga ahensiyaha sa mga kwestiyonableng transaction sama diha sa Kapitolyo sa pagpalit ug mga sardinas ug ang bag-ong pag-award sa usa ka security agency.
Kun way Benhur Luy kinsa maoy mipagya niining P10 billion pork barrel fund scam nagpadayon ang pakigkonsabo ni Janet Lim-Napoles sa mga kurakot nga mga senador ug mga kongresista.
Asa man ang gipanghambog sa taga-Ombudsman ug taga-COA nga mga ngilngig kaayong mang-imbestigar sa mga government transactions?
Kun nanarbaho pa unta ning mga ahensiya sa gobyerno nga atong gisaligan dili unta ingon ani kadako ang makawat sa atong panudlanan.
Ang labing makauuwaw kay dunay mga Sugboanong magbabalaud nga naapil sa listahan ni Napoles.
Angay sab ning imbestigahon sila ug klarohon gyud aron manubag ni sila sa katawhan.
Dili makonbikto ning mga tawhana kun kutob ra sa listahan. Nagkinahanglan ta og lig-ong pruyba sa ilang pagkakurakot.
Makapanglipagho kita sa mga kalamboan karon sa mga bag-ong nadiskobrehan bahin ni Janet Lim-Napoles kay gawas sa mga mahalong sakyanan, mga balay, kwarta ug uban pa, nabisto usab ang kadaghan sa iyang mga mahalong alahas.
Aber, tan-awn nato kun paspasan ba pag-imbestigar sa taga-Ombudsman Visayas ug COA-7 ang tanang mga kanhi ug incumbent legislators nga taga-Sugbo nga apil sa listahan ug bisan kadtong wa maapil sa Napoles list.
* * *
With all due respect nila ni manlalaban Inocencio Dela Cerna nga mga legal counsels nila ni Police Chief Supt. Romualdo Iglesia ug mga kaubanan sa Highway Patrol Group, igo ra gyud silang naglangay-langay sa kaso niining ilang pag-file og motion for voluntary inhibition sa mga piskal nga naglangkob sa five-man investigating panel.
Akong sublion nga dili gyud intawn maka-impluwensiya si Cebu City Councilor Nestor Archival sa mga piskal sa probinsiya kay wa gyud intawn magdawatan og allowance gikan sa Cebu City Government.
Kun morekomendar man ang mga piskal nga i-prosecute sa husgado sila si Iglesia sa pag-ambush patay nilang manlalaban Noel Archival, wa kana magpasabot nga nagawngan sa impluwensiya ni konsehal Archival kun dili gi-base intawn ang tanan sa ebidensiya.
Akong subli-on nga mas makapabor man gani sila si Dela Cerna kun huyang gyud ang ebidensiya kay inig ka-acquit nila ni Iglesia sa korte, mo-apply na ang “law on double jeopardy.”
Sa mga karaan ug ngilngig nga mga practicing lawyers, dili mosalida sa level sa preliminary investigation sa piskaliya.
Adto sa husgado kumbatihon ang kaso aron sigurado ang kadaugan.
Magduda man lang ko sa mga abogado nga mosalida pag-ayo sa preliminary investigation. Full blown trial na lang ta aron makitang katag!
* * *
Akong gikalipay nga gi-aprobahan ni Presidente Benigno Aquino III ang pag-usbaw sa mga benipisyo sa mga trabahante nga madisgrasya intawn samtang na-narbaho.
Sa Executive Order No. 167 gipatas-an sab ang funeral benefits sa mga mamumuo ubos sa Employees’ Compensation Program.
Gipatas-an sab sa presidente og 10 percent across-the-board ang pension sa “permanent partial disability,” “permanent total disability” ug ang “survivorship pension” sa private sector.
Subay niini, gimandoan ni Pangulong Aquino ang Employees Compensation Commission, Social Security System ug Government Service Insurance System nga maggahin og kwarta pagpatuman sa benepisyo sa mga trabahante.
May na lang kini intawn bisag uwahi na kaayo kay natubag na ang gipangandoy sa kadaghanan.