Super Hirit
Pwerteng paita gyud sa kahimtang sa atong mga kaigsoonan nga biktima sa kalamidad sa linog ug bagyo.
Hangtud karon nagbaha pa ang mga reklamo nga akong nadawat pinaagi sa tawag sa telepono ug sa text.
Ang sagad reklamo mao: Ang kakuwang sa mga tabang nga ilang nadawat unya baho ang bugas, gipamolitika ang distribution sa bàrangay ug municipal level ug ang giingong pagpanago sa mga opisyales sa lungsod sa mga bugas ug ubang “relief goods” nga hinabang gikan sa katawhan.
May mga reklamo batok sa taga-Department of Social Welfare and Development kon DSWD kay ilang kabanay nga gikan sa Tacloban nga anaa nagpuyo sa ilang mga panimay kausa ra gihatagan og 2 kilos bugas, 5 sardines ug 5 beef loaf unya gipangprangkahan nga dili na pabalikon sa pagpangayo kun dili mopuyo sa evacuation center.
Kung tinuod man kini, makita gyud kun unsa kaswapang ning taga-DSWD. Wa lang gyud huna-hunaa ba nga kining pagpapuyo sa mga kabanay nga taga-Sugbo og asa dapita dako na kaayo kini og tabang sa gobyerno.
Di man siguro ingnon nga magsalig ning mga tawhana hangtud sa hangtud sa taga-DSWD. Ang punto ra gyud niini kay nahibaw sila nga ang mga hinabang gikan sa gawas para nila ug dili alang sa taga-DSWD.
Ang taga-Bohol sab intawn nga wa pa makabangon sa 7.2 nga linog ilabina ang taga-Basak, Loon ug ubang mga parte nanawagan intawn og tabang ilabina tubig-mainom kay nihit gyud kaayo.
Sama lagi sa akong giingon nga maayo unta nga magpadayon pa kita sa pagpanghatag ngadto sa mga biktima kinsa nagpanghamoy intawn sa tudlo.
Sayop gyud kining pagpahunong ni Gov. Hilario Davide III sa “relief operations” kay ang mga biktima didto sa northern Cebu kagidlay pa sa sitwasyon. May man gud unta ning mga tawhana nga parehas nato og kahimtang nga may pundong kwarta ug dunay trabaho.
Di makasabot si Governor Junjun sa panginabuhi sa mga biktima ni Yolanda nga maglisud gani og kaon katulo sa usa ka adlaw kay wa siya makatilaw kay sa pagkataw ni Junjun daan na silang haruhay kay abogado ang amahan nga si former chief justice Hilario Davide Jr.
Kining mga tabang gikan sa ubang kanasuran nga wa pa gani maablihi, asa man kini paingon? Taga-DSWD ray mabulahan? O ba kaha ibaligya sa taga-gobyerno ngadto sa black market aron gamiton sa pamolitika?
* * *
Tinuod, supak sa balaud ang pagpanglimos sa kadalanan. Dunay gitawag nga “Anti-Mendicancy Law” diin ang manglimos ug ang molimos parehas nga dakpon og silotan.
Karong bag-o nanawagan ang taga-DSWD sa mga taw ilabina sa taga-Marabut, Samar ug ubang parte dinhi sa Kabisay-an nga gidili gyud ang pagpanglimos kay peligro sab sa disgrasya.
Pero alang nako mas maayong manglimos ang mga biktima bisag supak sa bisan unsang balaud sa Pilipinas kay epekto kini sa inutil nga pangagamhanan ni Presidente Benigno Aquino III ug DSWD Secretary Dinky Soliman pagtabang sa mga biktima.
Kun gitagad pa dayon sa gobyerno ang ilang panginahanglan, way magpakaulaw sa pagpanglimos.
Ang mga tawo nga nanglimos nangindahay nga dunay ikapalit sa mga construction materials aron makatukod og balik.
Dinhi sa ato sa Central Visayas, naay ihatag ang gobyerno sa National Housing Authority kon NHA-7 para balay apan pwerteng gamaya ra kay tag-P5,000 ra og limitado pa gyud ang hatagan kay 20,000 ra ka pamilya.
Ambot unsaon paghatag og kaangayan sa tanang mga biktima kay sa data sa Kapitolyo miabot og P104,200 ka mga panimay dinhi sa Sugbo ang nangaguba sa bagyong Yolanda.
Nabalaka ko nga ang ilista sa mga politiko nga maoy recipients ila rang mga dumadapig.
Akong sublion nga puslan man nga way klarong tabang ang gobyerno sa tanang mga biktima ipadayon ang pagpanglimos kay tipik ug kabahin kini sa survival.
* * *
May punto si Deputy Ombudsman Pelagio Apostol sa iyang mga kabalaka kabahin niining gilusad nila ni Cebu City Mayor Michael Rama nga “Piso Mo, Hospital Ko” aron pag-construct ug bag-ong Cebu City Medical Center kon CCMC.
Pero natinga lang sab ko kun nganong dugay kaayo siya naka-react niining maong isyu isip anti-graft official. Magduda lang ko nga dunay nagdiktar ni Apostol.
Kagahapon si Carlo Dugaduga tigpamaba sa City Hall miklaro nga ilang i-comply ang pagpangayo og permit sa DSWD aron way daghang samok.
Gisaad ni Dugaduga nga duna gyud silay transparency ug estrikto kaayo ang City Treasurer’s Office pag-ihap sa sulod sa mga containers.
Alang nako kun ganahan si Apostol nga mo-monitor sa day-to-day operation sa “piso-piso campaign” mas maayong magbutang siya og ilang tawo nga maoy maniid kanunay.
* * *
Branch Clerk of Court ni Regional Trial Court kon RTC Judge Estela Alma Sinco nga si manlalaban Carlyn “Toy” Carillo Posadas sa RTC 12 naadmit karon sa pribadong tambalanan kay na-dengue.
Ang mga kauban ni Toy ug iyang igsoon nagtoo nga ang lamok nga nakapaak, diha gikan sa ilang gimontar nga tent sa gawas sa Palace of Justice samtang anaa sila nag-opisina.
Tinuod nakabantay ko nga dunay daghang lamok karon ilabina sige og uwan human sa bagyong “Yolanda.”
Si Piskal Roy Carillo igsoon ni Toy mitug-an nga sa sinugdanan grabe gyud ang pag-ubos sa platelet sa iyang igsoon apan misaka na karong bag-o.
Kinahanglang di gyud mokompyansa. Mas maayo tingali nga mo-request si RTC Executive Judge Soliver Peras og fogging sa City Hall samtang usa pay nagsakit.