Ligdong, kugihan ug excellent crusader ang una nakong pagkaila ni Cebu Gov. Hilario “Junjun” Davide III niadtong mga mid-’90s isip associate graft investigation officer sa Visayas Ombudsman sa panahon ni Deputy Ombudsman Arturo Mojica.
Sangko sa langit akong respeto kaniya pun-an sa kaligdong sa amahan nga si former chief justice Hilario Davide Jr.
Dili pa abogado si Gov. Junjun niadtong higayona sa una nakong pag-ila kaniya, apan saksi ko sa iyang mga trabaho kaniadto nga moimbestigar dayon kun dunay mga kuwestiyonableng transaksiyon ug mga proyekto sa bisan asang opisina sa gobyerno.
Bisan gani nga dili katuhoan ang mga reklamo kaniadto ug bisan tawag lang sa telepono, able kanunay sa pag-imbiestigar kay krusada lagi batok sa corruption.
Sa ilang pangampanya kaniadto ni Vice Gov. Agnes Magpale ug mga kaalyado sa Liberal Party, ilang gipahimuslan ang isyu sa suspension ni kanhi governor Gwendolyn Garcia ug ang mga anomalosong transaksiyon ni Gwen nga maoy hinungdan sa pagkaparot ni kanhi kongresista Pablo John Garcia pagkagobernador.
Pero kumusta na man ang dagan sa iyang pagdumala sa Kapitolyo? Nagkayamukat, nagkamuraskat ug nagkamuratsing? Padayon ang iyang pagkakonsentidor ug pagdupa sa iyang mga opisyales nga mihimo og mga anomalosong transaksiyon?
Nagpadala na sa maot nga sistema ang akong giila nga tarong kaniadto?
Makapaisa na gyud sa kilay Gov ang mga kalamboan diha sa Kapitolyo karon ilabina nga wa gyuy imbestigasyon nilang Evelyn Senajon kanhi provincial social welfare and development officer ug kang manlalaban Orvi Ortega, chairman sa Pre-Qualification Bids and Awards Committee pagpalit niadtong “Tosen” nga sardinas nga mahal ra ang presyo ikomparar sa na-canvass ni retired provincial general services office head Eva Encabo.
Hadlok si Gov mopadayon pag-imbestigar sa sardinas kay ma-igo iyang paryente nga maoy chairman sa BAC nga maoy labing gamhanan sa tanang transaksiyon sa Kapitolyo?
Karong bag-o, sa isyu sa security provider, siyaro sab kun wa mokuwestiyon si Gov. Junjun sa “propriety” niining pag-insister nilang Ortega sa pagpa-takeover dayon sa “Black Pearl Security Agency” bisag wa pa ma-award ang bidding ug bisag wa pay kontrata ug way Sangguniang Panlalawigan board resolution.
Dili isyu alang nako nga gipulihan ang “Tactical Security Agency” nga gituhoan nga ang mga guwardiya pro-Garcia.
Pero ang nakaporke man gud dunay ubang security agency nga nindot kaayo og offer sama sa pag-montar og X-ray machines ug may K-9 dogs nga wala sa “Black Pearl Security Agency.”
Unya ang nakapasagmuyo pa gyud kay ang mga guwardiya sa “Black Pearl” kuwang sa armas unya lousy pa ug mugbo ra og height nga di parehas sa ilang gipang-pulihan nga insakto sa barog ug kataha-an gyud.
Unsa may buot ipasabot niini? Gikopya na ni Gov Junjun ang mga sayop kaniadtu ni Gwen nga maoy ilang gialkontra kaniadto?
Tinarong man kaha ning ato Gov? Kun nalutsan si Gov sa sardinas nga sigurado ko nga dunay mga nakakomisyon, magpakabuta-bungol gihapon ta sa “Black Pearl”?
Nahibawo ko Gov nga tarong ka, pero lahi na sab nang istorya nga bisag kuwestiyonable, imo gihapong i-tolerate. Magduda na ko ana nga natakdan ka sa pagpahimulos sa panahon!
* * *
Kinahanglang ipa-priso una ang tulo ka mga senador nga gipangkasohan na sa Sandiganbayan og kasong plunder ug kasong anti-graft human nalambigit sa multi-billion pork barrel fund scam uban ni Janet Lim Napoles.
Kini aron makita gyud nato kun unsa kaseryoso ang atong nasud pagtaral sa mga kurakot sa gobyerno.
Ang normal nga procedure sa Sandiganbayan mao nga mo-acquire una ang mga justices og jurisdiction sa mga akusado sa dili pa tagdon ang mga legal remedies nilang Senators Juan Ponce Enrile, Jinggoy Estrada ug Ramon “Bong” Revilla.
Gani nanggawas na ang estorya nga maglumba kining tulo pag-file og omnibus motion nga ipa-defer ang court proceedings ug ipauktaba ang issuance sa warrant of arrest alang nila.
Gawas niini, daghan silang option sama sa pagpadeterminar sa existence sa probable cause, motion for reinvestigation ug pag-file sa petition for bail.
Sama sa akong giingon sa unahan, nga dili maayong tugtan ang ilang mga hangyo kun dili sila magpagapos.
Alang nako, aron way eskandalong mahitabo sa Senado, mas maayo pa nga mo-surrender daan ang mga senador ug dili magtago-tago kun tinuod nga inosente gyud sila sa mga kaso.
In fairness hinuon ni Revilla, nagpaabot siya sa iyang panimay sa mga arresting officers.
Niadtong Sabado medyo mieksena si Local Government Secretary Mar Roxas sa pag-inspection sa Philippine National Police detention facility alang sa tulo ka mga senador.
Dili to pagyaga-yaga kang Roxas ngan nga kontra partido nila sila Enrile et al? Ambot lang kaha kun wa bay labot si Presidente Benigno Aquino III sa priority development assistance fund (PDAF) scam?
Si Roxas wa na maapil kay maayong pagka-doktor nilang Justice Secretary Leila De Lima ang affidavit ni Napoles?
Nabalaka baya ko nga paingon ta sa kagubot niini kay nanggawas kining mga alegasyon karon nga dunay “selective justice” kay ang taga-opposition ra ang gipangkasohan bisag dunay taga -administrasyon nga apil sa PDAF scam.