Matag inom nako og Gatorade mangutana dayon ang mga higala nako kon wa ba ko magkalibanga. Pirme akong makuratan ning maong pangutana. Wa man gud ma advertise ang Gatorade isip tambal sa sakit sa tiyan. Gi-market man kini nga thirst quencher ug sports drink. Sa ako lang nasabtan –ambot lang kahag sakto ba ni- gamay ray kinahanglan mong imnon nga Gatorade -tungod sa iyang electrolytes- para pawa sa imong uhaw labi na kon itandi mo sa gidaghanon sa imong imnon nga tubig pagpatangtang sa imong uhaw.
Sa ato pa, mawa ang imong uhaw pero di mobug-at ang imong tiyan. Wa kini balor sa mga ordinaryong tao apan importante kini sa mga athlete. Sumpa kini sa dehydration nga dili maka pabug-at sa ilang lawas ug paminaw.
Matud pas usa nako ka higala nga taga Minglanilla, diha kunoy usa ka higayon nga ang iyang bata nga pag-umangkon ug ang ilang tulo ka katabang gipang-dengue. Iyang gipa admit sa ospital ang iyang pag-umangkon ug iyang gipabantay ang iyang mga katabang. Wa na kuno niya gikonsulta sa doctor ang iyang mga katabang. Iya na lang kining gipa-inom og tambal sa hilanat og gipa-inom og kinarton nga supply sa Gatorade. Ambot kon tinuod ba kini apan mao kini iyang gisulti nako. Ug nagkanayon siya nga nagdungag guwa gikan sa ospital ang iyang pag-umangkon og ilang mga katabang nga wala nay hilanat.
Matud pa gi-cool down kuno sa Gatorade ang system sa ilang lawas samtang nakigbatok sila sa hilanat.
Tungod sa commercial success sa Gatorade, natural lang nga dunay moatbang naini. Ug kini mao ang Powerade. Sa akong nabasahan sa internet puros sila dunay vitamins (mostly B complex), carbohydrates (sugar), minerals ug electrolytes (sodium ug potassium).
Matud pa ning maong site nga ang gigamit nga sugar sa Powerade mao ang high-fructose corn syrup nga associated kuno sa mga health risks sama sa increased abdominal fat kon madaghan mo pag-inom.
Mas daghan og vitamins ang Powerade ug labaw og gamay ang electrolytes sa Gatorade.
Si Lebron James sa Miami Heat maoy endorser sa Powerade. Sa iyang unang duwa sa 2014 NBA Best of Seven Championship batok sa San Antonio Spurs mi cram ang tiil ug bitiis ni James. Na dehydrate siya sa kainit sa Alamodome sa Texas (home court sa Spurs) nga nagub-an og air-conditioning system. Dunay usa ka waterboy nga miingong gitunolan niya si James og Gatorade apan wa kuno kini modawat. Ug dinhi gasugod ang bugalbugal batok sa Powerade.
Dihang ni-bounce back ang Heat sa game 2 mikiat dayon sa Twitter ang Powerade nga wa sila masayop sa ilang endorser. Apan karong game 4 ga-sigeg balik si James sa bench. Gisakitan kunog tiyan matud pas mga announcer, malagmit kuno dunay diarrhea. Ambot kun tinuoray ba gyung makatabang sa sakit sa tiyan ang Gatorade apan kon tinuod man kini di gihapon makainom si James niani kay supak man kini sa iyang kontrata.
Usa na lang ka daug ang kuwang sa Spurs ug mahimo na nga magtagay og Gatorade ang mga fans sa San Antonio.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
