Samtang, somewhere

Samtang nangmangtas si Lebron James sa first quarter sa 5th game sa best of 7 National Basketball Association finals diin nakigbangga ang iyang defending champion nga team nga Miami Heat batok sa tang-an nga San Antonio Spurs… somewhere in Seattle, Washington, gihaya ang pinaka-inila nga radio personality sa America nga si Casey Kasem.

Si Kasem ang hinungdan nga okay rag di mi manglaag inig ka Domingo sa hapon kay maminaw ramis iyang American Top 40. Gikan sa 1970 ngadto sa 2004 ang pag-host ni Kasem sa maong syndicated radio show. Tingali, usa kadtos naka-brainwash sa pipila ka generations nga na pro-American kaayo ang pagbati.

Siya usab ang ni-voice sa character ni Shaggy sa Scooby Doo ug ingon man sa character ni Robin sa Super Friends. Gigamit usab iyang tingog sa Sesame Street. Daghang di makalimot sa iyang pulong sa panamilit matag human sa iyang programa diin moingon siyag –“Keep your feet on the ground and keep reaching for the stars.”

Kagikan og mga Lebanese, namatay si Kasem sa pangidarong 82 anyos. Taudtaud na siyang ga-antos sa sakit nga Parkinson’s ug sa usa ka matang sa Dementia. Nagkinihaay ang iyang mga anak ug ang iyang ikaduhang asawa kun kinsay angay nga mo-atiman kaniya. Nidaug sa kaso ang iyang mga anak.

By coincidence, St. Anthony ang ngan sa ospital sa Washington diin nawad-ag kinabuhi si Kasem.
Samtang ni-overtake na ang San Antonio Spurs sa Miami Heat sa 2nd quarter… nagpunay og post og mga picture sa Internet ang Isis (Islamic State of Iraq and Syria) sa ilang gipang-execute nga mga sakop sa Iraqi Security Forces nga ilang nabihag sa mga dakbayan sa Iraq nga ilang gi-atake.

Tungod sa kabangis ning Isis, bisan ang Al-Qaeda dili mo-angkon kanila. Gapunay na kini karon og panguha og daghan pang mga dakbayan sa ilang pagmartsa paingon sa Baghdad.

Kaliwat og Sunni kining mga militanteng ISIS. Apan ang mga presidente sa Iran ug Iraq puros mga Shiite og kaliwat. May usa ka opisyal sa Iraqi army nga miingon nga kon maabot sa Baghdad ang pwersa sa ISIS malagmit dili makig kombati nila ang sakop sa Iraqi army nga kaliwat og Sunni.

Daw gigapos ang America ning maong hitabo kay una dili buot si Obama nga makabsag kinabuhi ang mga Americano ug ikaduha, mahadlok sila nga malambigit ning duha ka Shiite nga pangulo sa middle east kay basig mahi-ubos sa America ang ilang mga ally nga Sunni ning maong lugar.

Ang America ubos sa pamunoan ni George W. Bush maoy gibasol sa kadaghanan ning nahitabong kagubot karon sa Iraq. Ang gobyerno ni Bush mao man guy nipapha sa abusadong rehimen ni Saddam Hussein gikan sa Iraq pero wala silay klarong plano sa maong nasud human mapalagpot nila ang maong diktador hinungdan nga daghan ang ga-inilogay sa gahum. Gipalagpot si Saddam Hussein sa America ubos sa duha ka pasangil. Una, nga duna kini “weapons of mass destruction” ug ikaduha, nga kunsabo kini sa Al Qaeda. Apan human sa ilang invasion, walay nakuha ang America nga ebidensya para sa duha nila ka pasangil.

Governor sa Texas si George W. Bush sa wa pa siya ma-presidente sa America. Naa usab sa Texas ang San Antonio Spurs. Gani ang game five diin gisugdan nag luba sa Spurs, giduwa man sa Alamo Dome sa Texas.

Nagwild og pamuntos sa third quarter ang backup guard ni Tony Parker sa Spurs nga si Patty Mills mao nga mi score kinig 14 points ning maong quarter… samtang nangandam na ang taga-Ukraine sa pagputol sa Russia sa ilang gas supply tungod sa dugay na nilang wa pag-bayad niani.

Gawas ning umaabot nga problema sa gas, ga-atubang karon og rebellion ang maong nasud kay ang mga kaliwat og Russian nga nanimuyo sa sidlakang bahin sa ilang nasud buot man moseparar sa ilang gobyerno.

Ug tuod man, nakuha gyud sa Spurs ang trophy sa NBA karong tuiga samtang nagsugod nag paniudto ang mga Bisdak ubos sa pagmug-ot nga di sila makakita sa awarding ceremonies ning maong torneyo kay unsaon magsugod na man gud ang programa sa ABS-CBN nga “Please Be Careful With My Heart.”