Haskang paeta gyud kun tinuod man nga dunay opisyal sa kapolisan nga nag-base sa Davao City nga nalambigit sa pagpusil patay sa Sugbuanong negosyante nga si Richard Lim King.
Kun mao ning kalakiha, dili na gyud ta kasalig sa mga pulis, kay inay maoy maghatag nato og proteksyon, mao na may mga kriminal.
Apan kinsa may mastermind ug unsa man gyud ang motibo sa krimen?
Pero alang nako, closed case na kining maong kaso tungod sa boluntaryong pag-angkon sa krimen sa usa sa tulo ka mga dinakpan, ug pun-an pa sa pagtumbok gyud sa mga eye-witnesses kang Paul Dave Molina Labang nga maoy mipusil sa magpapatigayon.
Ang tulo ka mga dinakpan gawas kang Labang mao ang managsoong Romel ug Rodel dela Cerna nga pulos trabahante sa Laud Firing Range.
Sa wa pa ang krimen niadtong gabii sa June 12, ang mga suspetsado nakadawat og tawag gikan sa usa ka police officer nga si King anaa na sa iyang opisina sa Vital C Building sa Sobrecarey Street, barrio Obrero.
Si Romel dela Cerna maoy unang misulod sa building unya misunod ang triggerman ug namusil sa biktima nga tag-iya sa Crown Regency.
Ang dakung isyu karon mao kun kinsa ang makadawat sa P1.3 million nga reward money.
Dili kaha mga pulis ra ang magbahin niini?
Sama sa akong giingon, sayop man ang pag-offer og cash reward apan dako kaayog ikatabang sa pagsulbad sa krimen.
* * *
Dili bag-o kining isyu sa paggamit sa mga paintbrush nga taas kaayo og lead content nga siguradong makadaot sa lawas sa tawo nga maoy gamiton sa mga namaligya ug barbecue pagpahid sa sauce ngadto sa karne nga gidangdang sa kayo.
Bisan niadtong nangindahay kita nga masulod sa Guinness Book of World Records niadtong longest barbecue grill sa Osmeña Boulevard, daghan kaayong migamit sa paintbrush. Pilde ta niadto.
Kun ang paggamit pa lang sa paintbrush sa atong mga barbecuehan maoy atong entry, siguradong daug ta kaniadto pa.
Dili makaya sa Eco-Waste Coalition ug Department of Health kun sila ray magsige diha og pangampanya sa dautang epekto sa paggamit sa paintbrush sa pag-barbecue.
Nagkinahanglan kini og local ordinance sa lain-laing local government units nga silotan gyud o ba kaha pasirad-an ang usa ka kan-anan nga migamit og paintbrush.
* * *
Bisan nagkaduol na ang 2016 presidential elections, wa pa koy nahuna-hunaan kun kinsay angayang palansaron.
Samtang dunay mga nanggawas nga mga istorya nga usa sa mga maayong pambato mao si Sen. Ramon “Bong” Revilla Jr, alang nako, dili maayong gamiton ni Revilla ang atong political process paglingkawas sa iyang dakong eskandalo sa Priority Development Assistance Funds.
Ang sitwasyon nilang Revilla, Sen. Jose “Jinggoy” Estrda ug Sen. Juan Ponce Enrile, lahi ra kaayo sa scenario nilang late Sen. Benigno “Ninoy” Aquino Jr, Sen. Antonio Trillianes IV ug uban pa nga nakadaug sa eleksiyon bisan gipangpriso kay ang ilang kawsa alang man sa kaayohan sa nasud.
Pero ilang Revilla, pangawat sa minilyong salapi sa katawhan. Maayong kawsa ba gud ang pangawat?
Swerte lang ning mga kanahan kay mga senador nga maoy hinungdan nga gihatagan sila og special treatment diha sa Philippine National Police Custodial Center.
Maglaum ko nga paspasan sa mga justices sa Sandigabayan ang husay sa mga kaso nilang Revilla, Estrada ug Enrile aron makita ang katag.
Maayo man gani nga death penalty ang ipakanaug nga sentensiya nilang Revilla.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
