Nyor Gamay (NG): Di ba Lakers fan man gyud ka, Nyor?
Nyor Daku (ND): O, Nyor. Bisag na napiang ug nanga-angol na to ang mga kanahan, Lakers lang gihapon ko. Ngano man diay?
NG: Di ba si Kobe man gyuy gada sa Lakers, Nyor?
ND: Aw, o. Mao bitaw nga gidako kaayo nila iyang sweldo.
NG: Unya mouyon kaha si Kobe nyor nga mahimo niyang kauban si Lebron?
ND: Ambot lang, Nyor. Di ko makapangutana ni Kobe ana kay gawas nga di mi silingan, dili sad mi friends sa Facebook.
NG: Pagka-pilosopo naman lang gyud nimo nga way sama, Nyor. O, ikaw na lay akong pangutan-on. Kun moduwa si Lebron para sa Lakers, Lakers lang gihapon ka? Di ka mobalhin sa New York?
ND: Nganong moduwa mas Lebron sa Lakers?
NG: Naunsa man ka, Nyor? Wa na diay ka magsunod sa NBA? Football na diay imong gikalingawan ron?
ND: Nindot ra nang football Nyor, kung naay magpina-akay, pero tagsa ra kaayo na mahitabo. Kapoy kaayog huwat kun kinsay maka-score.
NG: Unya, nganong wa man ka kahibawo nga free agent na si Lebron?
ND: Nakabasa ko ana, Nyor. Pero daghan kaayong team mag-ilog ana, Nyor. Ang San Antonio ra tingaliy wa maglaway anang Lebron. Unya malagmit, pugngan pa gyud na sa Heat. Mao nga morag gamay rag purohan nga mapunta nas Dodong Lebron nimo sa Los Angeles Lakers.
NG: Pero nakahibawo ba sab ka Nyor, nga free agent napud si Carmelo Anthony? Ug nga daw walay intensyon si Phil Jackson nga mopugong kaniya pagbiya sa New York?
ND: O, nakadungog ko ana, Nyor. Pero unsa may labot ana ni Anthony sa pagka-Lakers unya ni Lebron?
NG: Dugay na nang ga-plano nga magkuyog sa usa ka team silang Lebron James ug Carmelo Anthony. Sukad pa niadtong nagkakuyog sila sa Olympics.
ND: Ha? Unsa man sila, Love Team nga magkuyog gyud? Kuyog-kuyog, holding hands. Silay mopuli sa Kimerald?
NG: Pagkahangaw na lang gyud nimo Nyor.
ND: Kinsa man say maka afford ining ilang love team nga dili magub-an og first five?
NG: Good question, Nyor. Ang ga-unang answer –Lakers! Wa na silay first five. Gani, tulo na lang ka players ang nahabilin sa ilang line up, way labot sa mga rookies sama sa ilang Fil-Am nga si Jordan Clarkson. Dunay natigom nga US $41M ang lakers Nyor nga ubos og mga US $22 milyones sa Salary cap sa NBA. Mao na kun kwartahay lang ang istoryahan, malagmit silay maka-score aning giingon nimo nga love team. Pero ikaw, Nyor, okay ra ka sa idea nga naa si Anthony ug Lebron sa Lakers?
ND: Uyon ra ko, Nyor. Kay win or lose, magamit ra man gihapon ning duha. I-barter nis Lakers ni Kevin Durant nga mahimo na nga free agent next year.
NG: Aw, o, tuod Nyor, free agent na man diay si Durant next year.
ND: Mao nga okay ra gihapon kos ilang love triangle ni Kobe. Sila na ang dalawang Mrs. Real. Pang primetime baya gyud ning drama sa Lakers, Nyor.