Mirisi kang Presidente Benigno Aquino III nga gi-apil sa Korte Suprema pag-deklarar nga unconstitutional ang iyang pundo nga “Disbursement Acceleration Program” kon DAP, nga way kalainan sa kontrobersiyal nga Priority Development Assistance Fund o PDAF nga gikalambigitan sa atong mga senador nga nangapriso na, ug sa ubang mga magbabalaud ug mga opisyales sa kagamhanan.
Sama lagi sa akong gibalik-balik pag-ingon, sa level sa Presidente medyo makasalig pa kitag gamay sa pagkupot sa kuwarta alang sa mga proyekto.
Pero sa project implementation, daghan nang kamot ang maglumba og kamas ug magpista ang mga piranha sa Malacañang.
Kun seryoso pa lagi ang presidente pagpakigbatok sa corruption sa nasud, iya untang paspasan pagpaimbestigar ang iyang mga ka-alyado nga anaa sa listahan ni Janet Lim-Napoles.
Baga sab kaayog nawng si PNoy kay bisag gitumbok na si Budget Secretary Butch Abad nga maoy nagtudlo ni Napoles pagkawkaw sa PDAF, wa gyud niya dawata ang resignation.
Mao nga samtang dili matul-id ning gobyernoha ug dili gyud mataral ang tanang nalambigit sa pagkawat sa kwarta sa katawhan ug mas pilion ni PNoy ang “selective justice” nga buot ipasabot dili niya ipataral ang mga kaalyado sa politika, manawagan ko sa katawhan nga suportahan ang Korte Suprema ug ipa-impeach si PNoy.
Nabalaka ko nga mo-abot ang panahon nga dunay molusad ug kudeta batok sa Aquino administration niining iyang paugat pag-depensa ni Abad ug sa iyang mga kaalyado sa politika.
Wa pa gyud makasabot ang Presidente nga mitibugsok na ang iyang performance rating?
* * *
Naka-black shirts kagahapon ang atong mga kawani sa korte nationwide agig pagsalmot sa ilang silent protest niining gipatuman sa Bureau of Internal Revenue kon BIR pagkaltas og 30 porsiento nga tax deduction sa ilang tinuig nga anniversary bonus.
Pero kadyot lang, nganong karon pa man sila mang-reklamo nga sukad pa man kini kaniadto nga kuha-an man gyud sa tax ang ilang bonus?
Hinuon, nagtuo ko nga nadak-an ra sila sama namong mga kawani sa private sector nga mobayad sab og buhis 30 percent sa mga extra income.
Unsa kaha no kung mag-civil disobedience kitang tanan unya dili mobayad sa buhis hangtud magmatinud-anon ang mga naglingkod sa gobyerno nga mga political animal.
Bisan lagi kami intawn sa media, mapungot nga magtan-aw sa among pay slip nga dagko kaayo og deduction unya pa-ingon ra ang tanan sa corruption.
* * *
Mahasol na sab karong adlawa ug karong Lunes, July 21 kitang mga trabahante ug mga estudyante kay magwelga ang mga driver ug mga operators sa mga pampublikong sakyanan.
Ang katuyoan ug ang puno’t-dulo niining tanan mao ang tag-as kaayo nga multa sa mga magpadagan og sakyanan nga colorum ug sa mga kalapasan sa batas trapiko.
Hinuon, nakasabot ko sa ilang sector kay dili baya lalim nga madakpan. Salamat sa mga magpasiugda sa transport strike kay nagpahibawo daan sa katawhan.
Pero kun buot sab huna-hunaon, makaayo man kini sa riding public ang gipatuman nga balaud sa national government aron kitang manakay luwas kanunay ilabina ang pagsakay sa mga colorum.