Tungod tingali kay walay casualty, mao nga ang mga tawo ra nga uhaw kaayo sa coincidence maoy nakamatikod o nanumbaling sa taho nga dunay usa ka Malaysian Airlines Boeing B737-800 nga nalumpingan sa lawas human kini mabangga sa usa ka hagdanan o service stairs dihang giduso kini sa hangin sa bagyong Glenda.
Malaysian Airlines ground crew loads cargo into a Malaysia Airline plane on the tarmac at Kuala Lumpur International Airport in Sepang, Malaysia, Saturday, July 19, 2014. The Malaysia Airlines jetliner with 298 passengers and flight crew onboard was shot down in war-torn Ukraine. (AP Photo)
Mao kini ang ikaduhang taho nga may kalabutan ang mga Boeing sa Malaysian Airlines.
Sayud na kitang tanan nga niadtong buwan sa Marso mikalit lag kawagtang sa kawanangan ang MH370 nga Boeing sa Malaysia Airlines. Hangtud karon, wa pa masayri kun unsay nahitabo sa maong eroplano nga milupad gikan sa Kuala Lumpur padung sa Beijing, China, apan gituhoan nga kalit lang miliko pagbalik pag-abot sa ibabaw sa South China Sea.
Daghan na ang sugilanon nga mibutho kabahin sa pagkawagtang ning maong abyon ug nalakip na niani ang pilot suicide, terorismo, UFO ug hi-jack. Gani, miabot na og 17 ka conspiracy theory ang nahimugso. Puros kini makahadlok ug makahimuot pero puros walay kapadulngan. Mao nga hangtud karon, duna pay mga paryente sa mga 227 ka pasahero ug 12 ka crew ning maong eroplano nga wa pa wad-ig paglaum nga buhi pa ang ilang mga minahal sa kinabuhi.
Ug sa miagi lang semana, may nahanaw na sab nga sakyanan ang Malaysia Airlines. Dunay usa ka pasahero sa Amsterdam para Kuala Lumpur nga mipasiaw og post sa social media sa hulagway sa iyang sakyan nga MH17 uban sa caption nga, “Kun mawagtang man gani ni, mao ni iyang hitsura.” Ug tuod man, nawagtang sa radar ang iyang gisakyan. Ug nahibaw-an na lang nga didto kini nakatag sa usa ka maanyag nga lungsod sa Donetsk, usa ka rehiyon sa Ukraine diin dunay mga Russian separatist rebels nga nakig-gubat karon batok sa ilang gobyerno para makahimo silag pro-Russian nga estado.
Gituhoan nga nasaypan nga eroplano sa military sa Ukraine ang MH17 og mao nga gitirahan kini og surface to air missile sa mga rebelde. Dunay tulo ka Pilipino nga sakay niani. Inahan ug duha niya ka mga anak. Uban kanila ang ilang padre de pamilya nga usa ka Indonesian. Apil na sila sa 298 ka mga pasahero ug crew. Gi-ingon nga 198 kanila mga Dutch sa Netherlands ug nga kasagaran kanila buot mobakasyon unta sa Malaysia.
Nakabsan og US $140 million ang Malaysia Airlines sa unang quarte lang sa 2014. Ug suma sa taho, tulo na ka tuig nga nag-sigeg ka alkanse ang maong airline.
Pero dili angay maguol ang Malaysia Airlines kay matud pas mga karaan, katulo mohapak ang dimalas unya dayon kini molakaw.