Akong tan-aw, inutil gihapon ang taga-Land Transportation Office kon LTO pagpanakop niadtong mga tawo nga mihimog modifications kon pag-ilis sa mga genuine ug original parts sa ilang motorcycle units.
Naka-ingon ko niini kay inutil sab ang taga-Department of Trade and Industry (DTI) pagsakmit sa mga substandard nga mga spare parts. Asa man ang taga-DTI? Nangatug?
Inutil ang LTO tungod kay gamay ra kaayo sila og enforcement personnel unya wala pa hatagi og renewal sa deputation ang kapolisan, City Traffic Operations Management ug ubang mga traffic enforcers nga makatabang unta sa pag-implementar sa mga traffic rules.
Gawas niini, mahilig kaayo og “ningas cogon” ang taga-gobyerno kay magsuol-suol sa pag-implementar.
Bisan sa helmet law, akong na-obserbahan nga nag-ayo lang sa sinugdanan ang atong taga-LTO.
Wa na ko makabantay nga nanakop ni sila karong bag-o.
Niadtong Sabado, atol sa among programang “Dialogue on the Air” sa dySS Super Radyo, si Aden Belza, officer in charge sa Administrative Division sa LTO sa Central Visayas nagkanayon nga dili pa gyud sila maka-define kun unsa ang gipasabot nga modifications sa mga sakyanan kay wa pay guidelines.
Buot ipasabot nga wa pay dakop nga mahitabo tungod niining mga problema.
Ang ako lang sa mga motorista, kalma lang, bisan niadtong nag-tiner ug saba nga tambutso, nag-usab sa side mirror, yantas ug ligid kay wa pay klaro kining tanan.
Bisan si City Councilor Roberto “Bob” Cabarubias nga gustong dakpon ang mga sabag tambutso mi-klaro nga tun-anan pa ang iyang ordinansa nga nag-amendar sa anti-noise ordinance kay iya karong patun-an nga ipadakop og apil ang mga motor nga dunay stereo or sound system ug kadtong dagko og busina.
Hala, pandaya ug tarong, Kons!
* * *
Daghan na kaayong reklamo nga akong nadawat gikan sa mga ginikanan bahin niining gipatuman sa mga public schools nga did-an sila pagpasulod sa ilang tagsa-tagsa ka mga tunghaan panahon nga mokuha sa ilang mga anak.
Kinsa man gyud ning polisiyaha? Sa Department of Education in Central Visayas? O ba kaha sa mga school principals?
Kagahapon man gud, akong nasaksihan nga makaluluoy kaayo ang kahimtang sa mga ginikanan diha sa Lahug Elementary School kay nanaghapnig og karton o ba kaha sako aron lang magyaka sa sidewalk samtang magpaabot sa mga bata .
Ang akong punto ba, nganong ingon ani man ang paagi intawn nga daw sama sa mga hayopan ang mga ginikanan nga way tag-iya?
Siyarog dili makahatag og gamayng lugar ang mga school authorities aron kahatagan og dignidad ang mga ginikanan.
* * *
Wa koy supak sa akong nadawat nga impormasyon nga ang Provincial Information Office sa Capitol maoy gihimong district office ni 2nd District Rep. Wilfredo Caminero.
Kini aron makatagad dayon sa mga panginahanglan sa iyang mga konstituwente.
Alang gani nako, mas maayo man nga silang unom ka mga kongresista sa probinsiya duna gyuy opisina sa Kapitolyo aron mas paspas ang tabang ilabina sa mga kabanay nga dunay pasyente diha sa Vicente Sotto Memorial Medical Center.
Hisgot na man gyud ta og 2nd district, dako kaayo kog pasalamat kun mabuak na gyud sa hingpit ang 2nd district nga maoy among disrito.
Ang scenario sa proposed House Bill 3149, magpabilin sa segundo distrito ang Argao, Dalaguete, Alcoy, Boljoon, Oslob, Santander ug Samboan. Samtang ang maglangkob sa 7th district mao ang mga lungsod sa Dumanjug, Ronda, Alcantara, Moalboal, Badian, Alegria, Malabuyoc ug Ginatilan.
Sukad pa gyud ko kaniadto nga misuporta niini kay dako ra kaayo ang distrito ug gawas pa, dehado gyud ang among distrito kun maghisgot tag proyekto ug kalamboan.
Makapa-abli sab kini sa akong huna-huna nga mosulod sa kagaw sa politika. Hehehehe.