Usa sa mga mitos sa Grego mao si Icarus nga milupad uban sa iyang amahan mga si Daedalus ginamit ang wax and feathers (mga balhibo sa mga langgam nga gipataput ginamit ang material sa kandila) para mo ikyas sa Crete. Gipahimangnu-an si Icarus sa iyang amahan kabahin sa mga butang nga angay niyang bantayan sa iyang paglupad apan daw nagkiat ug gadanghag si Icarus, milupad siya paduol sa adlaw mao nga nahilis iyang paku og nahagsa siya.
May mga nag-ingon nga usa kuno kini ka parabola sa garbo ug hambog. Apan mas daku nga panan-aw nga usa kini ka drama sa damgo sa tao sa paglupad, sa pag-iskapo ug sa pagkab-ot sa iyang ambisyon.
Nianing tuig diin daghan kaayong abyon nga nagsunodsunod og kahagsa daw mobutho sa hunahuna sa nakasinati ning maong sugilanon ang imahin ni Icarus nga nagkapakapa sa hangin padung sa iyang pagka-hagsa sa kalibutan.
Ang pinaka-duol tingali sa sugilanon ni Icarus mao kining nahitabo sa amahan og anak nga buot mo establish og record sa paglibot sa tibuok kalibutan ginamit ang usa ka single engine plane.
Si Haris Suliman nga gapanuigon pa og 17 anyos mao unta ang pinakabatan-ong co-pilot nga makalibot sa tibuok kalibutan sulod sa 30 ka adlaw. Inubanan sa iyang amahan nga si Babar, mo lupad silag 26,500 miles, mo landing og 25 ka higayon sa mga 15 ka nasud. Ang maong adventure alang sa usa ka charity organization sa Pakistan.
Apan nahagsa ang ilang gisakyan sa dagat sa may Samoa. Nakit-an ang patay nga lawas ni Haris apan missing pa ang iyang amahan ug ang eroplano.
Niadtong 1937, inubanan ni Freed Noonan, misuway si Amelia Earhart paglupad libut ang tibuok kalibutan apan nahagsa usab ang iyang eroplano sa Pacific Ocean duol sa isla nga Howland.
Hangtud karon wala pa hipalgi ang lawas sa duroha.
Si Amelia Rose Earhart kanunay nga pangutan-on kon paryente ba sila sa nahanaw nga Amelia Earhart, kon pilot ba usab siya, kon duna ba usab siyay ambisyon nga tuyokon pinaagi sa abyon ang tibuok kalibutan.
Tingali tungod sa maong mga pangutana nagpakisusi si Amelia Rose ug nasayran niya nga dili diay sila paryente sa orig nga Amelia. Ug tingali tungod usab sa maong mga pangutana nahimo na usab nga pilot si Amelia Rose ug iyang nahimo ang wa mahimo ni Amelia –ang paglibot sa tibuok kalibutan isip piloto. Natuman niya ang tahas sa iyang sangay.
Kay nahimo kini ni Amelia Rose, sa edad nga 31 anyos, siya na ang pinakabatan-ong babaye nga nakalupad libot sa tibuok kalibutan ginamit ang usa ka single plane engine. Duol na mo 40 anyos ang unang Amelia dihang nawala siya.