Nahug nga win-win solution ang desisyon ni RTC Judge Ester Veloso kagahapon sa pagkonbikto kang SPO1 Adonis Dumpit sa kasong pagpusil-patay kaniadtu kang Ronron Go nga gi-tuohang tulisan.
Pero ang nakaporke niini kay makapadismaya gyud sa atong kapolisan sa panahon nga dunay mga criminal nga gukdon.
Ang nakanindot sa hukom sa huwes kay wa konbiktoha si Dumpit sa kasong murder sa pagpatay ni Go.
Nahug nga gi-downgrade sa huwes kay igo rang gikonbikto sa kasong homicide nga gamay ra ang sentensiya kay sa murder nga ang maximum penalty mao ang reclusion perpetua o life imprisonment.
Alang nako, kinahanglang dawaton ni Janet Badana inahan ni Ronron ang desisyon. Maayo gani kay gikonbikto pa si Dumpit.
Unsa kaha kung gi-abswelto si Dumpit ni Judge Veloso? Maayo gani kay wa makonbinse ang huwes sa depensa ni Dumpit nga gipamusil sila ni Ronron.
* * *
Napalpak ko sa tulo ka mga dagkong butang kagahapong adlawa nga pulos importante alang kanako.
Una, wa ko maka-cover sa promulgation sa usa sa mga sensitibong kaso nga akong gisundan kanunay nga mao ang kasong murder batok kang SPO1 Adonis Dumpit sa sala ni RTC Judge Ester Veloso sa branch 6 sa Qimonda IT Center.
Ika-duhang paltos mao ang kapakyas nako pag-cover sa pinutlanay sa mga acacia trees didto sa dakbayan sa Naga.
Samtang ang ikatulong bililhong butang nga na-inutil sab ko, mao ang paggukod nako sa oras sa gipahigayon nga “Pakayaw” didto sa Casay Dalaguete nga maoy main event sa ika-40 days nga kamatayon sa akong pinanggang inahan.
Sa mga kinaraan, ang “Pakayaw” maoy seremonya sa mga batid sa pagtulon-an sa Diyos diin ang mangulo ug mga sakop sa pamilya mohimog pormal nga kalihukan aron itugyan na ngadto sa Langitnong Amahan ang kalag sa namatay.
Unta kining maong kalihukan maoy buot nakong saksihan kay wa gyud ko maka-experience.
Ang rason nganong wa ko maka-abot sa “Pakayaw” tungod kay naabtan mi sa taas nga traffic diha sa dakbayan sa Naga kay nag-bumper-to-bumper na ang traffic pag-abot namo, tungod sa pinutlanay sa mga acacia didto sa Tinaan, Naga.
Nagka-gidlay gyud ang mga pasahero nga dunay gi-apas nga oras sama nako. Apan bintaha lang kog gamay kay nag-motor ko paingon didto sa Dalaguete.
Ang mga dagkong bus company mi-diskarte pagpasa-pasa sa ilang mga pasahero.
Ang uban nagsakay ug habal-habal kay di maka-antos pagbaktas ug layo-layo. Unya pwerte sang nakapahimulos sa ubang operator ug habal-habal kay dagko kaayog pangayo.
Practically daghan gyu’ng mitiyabaw sa kahasol nga na-experience sa pinutlanay sa mga puno-an sa acacia.
Sa report ni Greggy Boy kagahapon sa Balitang Bisdak, mga 5 pm hanoy na ang mga sakyanan.
Si Fr. Robert Reyes nga iyang gika-uban mipadayag nga mohimo pa siyag mga lakang aron mababagan ang pagpamutol sa ubang mga puno-an sama sa iyang kawsa didto sa Pangasinan.
Sama sa akong giingon, nga kung mahimo dili nalang putlon ug tiwas ang mga kahoy gikan sa Naga ngadto sa dakbayan sa Carcar unya mag-abli nalang ug laing dalan paglikay sa mga kahoy.
* * *
Haskang paeta gyud kay mo-abot na diay ug 27 ka mga pulis dinhi sa Central Visayas ang gipangtaktak tungod kay nalambigit sa illegal nga drugas.
Dunay pulis protector sa drug lord.
Samtang sa Cebu Provincial Detention and Rehabilitation Center (CPDRC), gi-rekomendar na ni warden Romeo Manansala nga ibalhin ug pwesto ang lima ka mga jail guards nga gituohang nalambigit sa pagpayuhot ug drugs sulod sa prisohan.
Maglaum ko nga panghukasan ning lima ni Governor Junjun Davide. Pakauwaw lang ning mga kanahan nga nagsaulog kita karon sa ika 445th Founding Anniversary. Maayong di hatagan ug bonus.