Nyor Gamay (NG): Maayo. Guru, naa ka diha? Dia koy da nga Kopiko LA. Mangape ta.
Love Guru (LG): O, Nyor Gamay! Nganong gada pa man intawn ka ana nga nia man tay daghang kape ning atong tolda.
NG: Maayo man sad nang magda ko panagsa kay ga sige naman lang kog yarok sa imong ipang tunol.
LG: Salamat Nyor, pero di gyud na kinahanglan nimong himuon kay nagkalata ang kape diris tolda. Dali, dayon. Unsa may atong concerns ron?
NG: Kadungog ka anang gipang-ingon sa mga hanggaw nga mas maayo kon batig panagway imong luguson kay magduda pa ang mga tao pero kon gwapa guilty naka daan?
LG: Hehe 80s pa man na Nyor. Pero ang rapist, gawas lang kon obsessed kini sa usa ka binuhat, dili man mangitag sexy o guapa o mahinhin. Ang target sa rapist nga makapatong siya ug maka exit nga walay sabit. So availability of time, place and victim ang iyang unang concern. Pero ang imong pangutana mas may kalabutan sa public opinion kay sa krimen nga rape. Di ba Nyor? Unsa man gyud ni kabahin?
NG: Diha man gud koy nadunggan nga basig mogamit sa angle nga sexual extortion ang shoplifter para makalingkawas siya sa silot sa iyang gibuhat. Wa kuno mokiha ang iyang gikawatan kay buot kini makighilawas. Gani mahimo siyang mo-ingon nga pasangil lang kawat para makapahimos ang hintungdan sa iyang lawas. Unya kay gwapa man ni Nyor basig tuohan kini og maka ipsot ni Nyor.
LG: Ayaw og kaguol Nyor kay napriso man gyud si Denice Cornejo. Ug samtang gaisturyahanay ta karon kabahin sa underage nga batan-ong shoplifter nga gi-ingong taga Sogod, Leyte, nga nakig selfie sa mga police nga wala mo blotter kaniya, gi-ayo naman siyag kulata sa facebook police. So dili na niya makuhag dali ang public sympathy.
NG: Uyon ba ka aning nahimo na nga watchdog sa mga way batasan ang mga sakop sa FB?
LG: Partly uyon ako niani kay nahimo silang police sa mga badlungon. Mura silag politeness police. Magbantaybantay nakas imong panghasi, pamalikas, panginsulto sa publiko. Dili man gud ma-ato sa traditional media ang pagmonitor sa mga abusado mao nga dako ang mahimo ning social media sa pag police sa mga abusado. Karon -you are just a post away ug tabangan nakag bunal sa internet.
NG: Sama ni Amalayaramalayar.
LG: O sama ni Amalayar. Pero duna usab akoy gikahadlukan tali ning mga bag-ong politeness police.
NG: Unsa may gikahadlukan nimo Nyor?
LG: Ang akong gikahadlukan nga mahimo unyang mangtas kining mga social media police ug nga ganahan na unya sila magsigig pamunal. Ug basig madala nila kining maong attitude gikan sa virtual world paingon sa real world. Nakuyawan ako nga ilang attitude na linya ra sa religious police ug religious fanatic sa middle east nga mobato sa mga babae nga giakusar og adultery hangtud mawad-an kinig kinabuhi. Ang atong giluk sa pagkadlit, dukol ug dagmal sa mga gituohang sad-an mao rang linyaha sa mga mobato-patay sa mga makasasala sa mga lugar diin hawd ang susama sa mga ISIS. Murag midasig ang social media ning maong attitude.
NG: Unsa may maayong himoon ani, Guru?
LG: Magsugod tas atong kaugalingon. Dili ta mo-ambit pag dukol sa gilaparo na. Mahimo ta moreklamo pero di ta managmal. Pero murag maayo nga mangape sa ta.