Maestra Magdalena (MM): Class, mao ni atong bag-ong subject karong tuiga – Terrorism. Terror ang root word niani. Be, class, unsa may terror?
Junior Gamay (JG): Abat-abat, ungo-ungo, kalag-kalag, multo, zombie, Dracula.
Brenda Dimangud (BD): Di man gud. Horror man na imong gihisgutan.
Junior Daku (JD): Hehehe.
MM: O, nikatawa man ka Junior Daku. Be, unsa may terror.
JD: Kahadluk, kulba, kakuyaw. Ang kalisang nga da sa linug. Ang kahadluk nga dala sa sunog. Mahimo man gani tingay apilon ang igking nga dala sa pabuto. Pero mahimo sad nang itawag sa mga tao nga angay kahadlukan kay bangis og kusog mo-punish. Sama sa mga magtutudlo nga kusog mo-hagbong. Sama nimo Ma’am Magdalena.
MM: Hoy, excuse me, Junior Daku. Kagwapa nako, hinganlan ko nimog terror.
JD: Sorry ma’am.
MM: Be, unsa may tawag sa mga tao nga magdag terror pinaagi sa panghasi, panghadluk ug gani pagpamatay sa mga dili makasukol kanila?
JG: Terrorist.
MM: Good. Unsa may tawag ning ilang binuhatan?
JG: Terrorism.
MM: Good. Ang number one terrorist sa kalibutan karon mao ang ISIS. Kinsay nakahibaw kon unsa ning ISIS?
JG: Di ba mga bayot na ma’am –Hi, sis.
BD: Di man gud. Yads may tawganay sa mga bayot.
JD: Na shodi naman nis Junior Gamay.
BD: Hehehe. Shodi nga bali.
JG: Brenda bugo! Nahagbong sa math.
MM: Hoy, ayaw mog away. Be, Junior Daku, unsa may ISIS?
JD: Islamic State of Iraq and Syria. Mga militante nga nag-akupar og mga parte sa Iraq ug Syria nga buot maghimog Estado sa mga Islam. Ilang pamatyon ang tanan nilang masugatan nga dili mo-uyon sa ilang pagsabut sa Islam. Sagol ni sila ma’am. Dunay mga Iraqui, mga Syrian unya duna puy mga European, Americano, Australian ug uban pa. Gani gikataho naman nga dunay mga Pinoy nga ni-apil nila. Daghan kunong taga Davao ma’am ang nangintra. Caliph ang tawag sa ilang leader.
MM: Be unsa may Caliph?
JG: Kana man nang ruler nga may kumpit pang-sukod sa bilbil, ma’am.
BD: Di man gud. Caliper man na.
JD: Hehehe.
MM: Be, Junior Dako, sulti-i imong mga classmate kon unsa nang Caliph.
JD: Mura na og Pope nila pero leader pud na siyag gobyerno ug military.
Martin Humok (MH): Ka wayok! Sto Papa nga dunay tanke ug special forces.
MM: Be. Sa Africa unsa may kuyaw nga terrorist groups didto?
JG: Ebola!
BD: Di man gud. Sakit man na ang Ebola.
JD: Hehehe.
JG: Brenda, Sipunon!
MM: O, Junior Daku, tan-awn tag abot bas Africa imong knowledge.
JD: Boko Haram, Ma’am.
JG: Salig man na siya ma’am kay naa na silay cable TV.
JD: Wa ma’am uy. Sa silingan ra ko tan-aw. Kay kon bati ang salidas HBO, CNN man sila. Tan-aw lang gihapon ko. Tambay ra man kos ila kay ako may tighugas plato ug sugu-og palit load nila.
MM: Be, way palabanay og cable, Unsa man ang ga-unang terrorista sa Pilipinas?
JG: Abu Sayop.
BD: Di man gud –Sayyaf man na.
JG: Brenda buogon!
MM: Hoy, Junior Gamay, dili mag bully ha.
MH: Terror man gud nis Brenda ni Junior Gamay, murag Hamas nga sigig pabutog rocket paingos Israel.
BD: Di man gud. Nisulti ra man ko.
MM: Si Junior Daku ra gyuy suhitog current events diri. Maypag motudlo na lang kag social studies Junior Daku.
JD: Di ko ma’am. Di ko gusto mag terror.
MH: Ay, Chizmiz!
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
