Medyo false alarm ang forecast niadtong Lunes sa taga Philippine Atmospheric Geophysical Astronomical Service Administration (PAGASA) nga mag-uwan ug kusog inig ka hapon ug inig gabii dinhi sa dakbayan sa Sugbo ug sa Central Visayas tungod sa Low Pressure Area (LPA).
Nahug nga way kapuslanan ang deklarasyon ni Cebu City Mayor Michael Rama nga gi-“half day” ang mga klase sa mga pampublikong tunghaan.
Sukwahi ang dagan sa panahon kay taligsik ra man sukad pa pagkabuntag hangtud sa gabii taliwa sa Low Pressure Area nga misulod na sa nasud.
In fairness wa man masayop si Director Oscar Tabada sa PAGASA Mactan kay ang iyang gi-text sa akoa possible man nga mokusog-kusog ang uwan gumikan sa grabeng dag-om.
Ang pulong nga possible, nagpasabot nga way kasiguruhan.
Si Mayor Rama sab nga mi-over acting, declare sab dayon ug suspension sa klase.
Ang ponto nako wa ko manumbok dinhi kung kinsay nasayop. Ang maayo nga sa sunod dili unta dayon gamiton ang gahom sa atong mga local chief executives pag-suspend sa klase kung may posibilidad nga tali-abot ang dakung uwan.
Sayang kaayo nga magsige kita ug suspenso sa klase nga way klaro.
Alang nako, ang insakto gyud nga palisiya mao nga kung dunay bagyo ug nabutang kita sa Public Storm Signal No.1 diha nata modeklarar ug suspension.
Kung uwan lang na-anad na kita ug labang-labang sa kalsada nga gibaha tungod sa pagka inutil gihapon sa atong mga nanaglingkod pagsulbad sa atong drainage system sa Metro Cebu.
Daghang mga working parents nga nagbagulbol niining tira pasagad sa pag-suspenso sa klase kay samtang ilang anak anaa sa eskuwelahan dili gihapon makuha ug sayo kay nagtrabaho pa ang ginikanan.
So asa man ang logic niini? Sa sunod, kung suspensohon ang klase suspensohon nalang sab ang trabaho aron way magbagotbot!
* * *
Gitawgan ko ni Atty. Inocencio Dela Cerna defense lead counsel nilang S/Supt. Romualdo Iglesia sa Highway Patrol Group (HPG-7).
Nagtoo ko nga mangasaba sa akong article nga napublikar niadtong Lunes nga ako siyang gihinganlan ug “crying baby” human siya mireklamo sa resolosyon ni piskal Jesus Rodrigo Tagaan sa kaso sa iyang mga kliyente nga pangkasohan ug multiple murder ug frustrated murder sa pag-ambush patay nilang Atty.Noel Archival.
Ang iyang pagtawag igo ra’ng nagpahibawo nga wa siya masuko ug mahi-ubos sa akong article bisag gisungog siya sa iyang mga amigo bahin sa napublikar.
Nagpahibawo si Atty. Insiong nga mo-withdraw siya isip legal counsel nila ni S/Supt. Iglesia ug PO1 Alex Bacani apan magpabilin siyang manglaban kang S/Inspector Joselito Lerion.
Ila nang naduso kagahapon ang “Motion To Withdraw As Counsel and Manifestation”.
Ang rason nga mo-witdraw siya kang Iglesia tungod kay mokuha kini ug laing abogado nga Manila based lawyer. Samtang sa kang Bacani iyang giklaro nga dili gyud siya maoy abogado niini.
Magpabilin siyang manglaban ni Lerion kay matud pa Bisaya.
Pero kining plano ni Atty. Insiong kaniadto pa ni nga mobiya siya paglaban ni Iglesia kung mapakyas pagpalingkawas sa piskaliya.
Ambot lang kung dili ba drama ni kang Atty. Insiong kay magpabilin siyang abogado ni Lerion.
* * *
Karong Sabado sa buntag buksan namong mga sakop sa working press ang among unang volleyball tournament nga ipaha-om sa nagkaduol nga kasaulogan sa Cebu Press Freedom Week.
Magpalahi mi karong tuiga, kay sa naandan, duwang basketball ang among ipahigayon.
Gituyo kini nga mag-time-out muna sa baskeball aron kahatagan ug panahon ang ubang mga sakop sa media nga mahiligon niining matang sa paugnat sa kusog ilabina ang mga kababainhan nga dugay nang naghandom niini.
Alas 8:00 sa buntag himoon ang opening diha sa compound sa Cebu Eastern College diin upat ka mga major beats ang magsangka sama sa combined Capitol/Judiciary; Police/Defense Press Corps; City Hall Reporters ug ang Metro nga langkuban sa mga sakop sa prensa nga nag-cover sa Mandaue, Lapu-lapu ug Talisay.
Ang ubang beat organizations puwedeng i-merge sa ubang team aron gyud malingaw bahalag mo-abot ug 50 ka players ang matag upat ka teams. Enjoy ta ha! Kita kits ta sa Sabado!
Magpasalamat na sab kami sa management sa Cebu Eastern College nila ni Sir Jefferson Go, Sir Sammy Sia mga Executive Board sa CEC ug kang Sir John Maraat sports coordinator ug property custodian sa CEC.
Magpasalamat sab kami sa suporta sa Coca Bottlers Philippines ingon man ni Ma’am Michelle So sa Executive Committee ug ingon man ni Sir Elias Baquero federation president sa Cebu Federation of Beat Journalists (CFBJ).