In fairness, makapaduda sab gyud baya kining sunod-sunod nga pagpa-nulis sa pito ka mga branches sa LBC Express dinhi sa Sugbo kay wa gyud magtagad ang management pag-hire ug mga guwardiya ug dili tanan may CCTV camera.
May camera man tuod ang ubang branch apan nahug nga props lang kay wa mag-function.
Unya na-obserbahan sa mga tigbalita nga igo ra’ng mangatawa ang mga kawani human tulisa sa gagmay’ng kantidad.
Ambot kung drama lang sa taga LBC kining mga pagpanulis aron sila mosamot ug kasikat sa publiko nga maka libre sa advertisement sa mga lain-laing media outfits. Butang kini nga angay’ng tubagon sa management sa LBC.
Namahayag kaniadto ang tagdumala sa LBC nga dili na sila mang hire ug guwardiya kay lugi sila sa negosyo.
Si Cebu City Mayor Michael Rama mihulga nga iyang pasirad-an ang mga LBC branches nga anaa dinhi sa dakbayan sa Sugbo kung i-compromise sa management ang security.
Kung mao man ang tuyo ni Mayor Rama nga ipatuman ang hugot nga seguridad dili lang i-single out ang LBC.
LBC ra ba ang way guwardiya ug way CCTV camera?
Ang ubang patigayon may guwardiya man tuod apan gipatrabaho sa laing mga butang o ba kaha dunay mga guwardiya nga mag-tugtug.
Kining mga CCTV cameras nga gimontar sa mga establismento, pulos ba kini nakapasar sa standards ug specifications?
Sa dili pa seguro pasirad-an ni Mayor Rama ang LBC kinahanglang ipa-susi sab niya ang tanang mga establismento nga may susama ug mga pagkuwang aron patas ang tanan.
* * *
Kataw-anan, apan seryoso ko sa akong sugyot atul sa akong programang “Dialogue On The Air” niadtong Sabado sa DYSS, nga kinahanglang magpalit nalang ug sakayan ang taga Department of Education (DepEd)-7 aron i-apod-apod sa mga pampublikong tunghaan nga suki sa baha panahon sa grabeng uwan.
Si Victor Yntig, Disaster Focal Person sa DepEd-7 miingon nga posibleng himoon kini nila ni Director Carmelita Dulangon.
Usa sa iyang giingon nga posibleng mangayo sila sa Bureau of Fisheries and Aquatic Resources (BFAR) ug sobra sa mga sakayan nga gipanghatag sa taga norte sa Sugbo human iyang nahibaw-an gikan kang Fire Superintendent Esmael Codilla nga mahal ang pagpalit ug ang maintenance sa rubber boat.
Si Marie Mignon Nillama, tigpamaba sa Department of Public Works and Highways (DPWH)-7 nga usa sa ilang matabang sa mga estudyante nga mangabasa paglabang sa lunop sa eskuwelahan mao ang pagbutang ug mga foot bridges.
Magsakayan nalang gyud samtang inutil pa ta pagsulbad sa problema sa drainage.
* * *
Nakatawa ko sa mga nanggawas nga hungihong sa akong mga kauban sa media nga nabungkag na ang Newsmen Basketball Association of Cebu (NBAC).
Kalooy sa Diyos pabiling anaa pa ang NBAC ug pabiling lig-on ang liderato niini uban namong Sir Bobby Inoferio NBAC Commissioner.
Gani kami gihapon ni Sir Bobby ug mga opisyales sa NBAC ang nagdumala niining padayong volleyball tournament uban sa pag-abag sa Executive Committee sa Press Freedom celebration nila ni Ma’am
Michelle So ug sa Cebu Federation of Beat Journalist (CFBJ) pinangulohan ni Sir Elly Baquero.
Kini maoy ikatulong tuig nga pagdumala sa NBAC sa paugnat sa kusog namong mga sakop sa media nga ipaha-om sa kasaulogan sa Cebu Press Freedom Week.
Sa unang duha ka tuig, among gipadayon ang naandan nga liga sa basketball.
Pero karong tuiga among gisuwayan ang duwang volleyball (mixed men/ women aron gyud intawon paghatag ug kaangayan sa kababainhan ug kalalakin-an nga mga beat reporters nga mahilig niini ug di makaduwa sa basketball.
Kalooy sa Ginoo milampos kami sa among opening niadtong Sabado sa buntag diha sa Cebu Eastern College (CEC) uban sa way putol nga suporta sa kinatibuk-ang management sa CEC nga gitambongan usab ni City Mayor Michael Rama.
Gani akong na-obserbahan nga tanang mga sakop sa media nga didto sa venue pulos gyud nalingaw ilabina ang kababainhan.
Daghang nagpasalamat nga natigayon na gyud karong tuiga ang duwang volleyball ug kini maoy pinaka-una nga liga sa volleyball sa Cebu Press Freedom celebration.
Akong subli-on nga niining Cebu Press Freedom Volleyball Tournament makaduwa ang tanang NBAC players bisag moabot pa ug tag 50 ka mga players matag team nga gibahig sa upat ka teams. Ang importante nga matag duwa langkuban sa upat ka mga babaye ug duha ka mga lalaki.
Human sa opening niadtong Sabado gisugdan sab dayon ang elimination round sa single round robin diin kami sa Judiciary and Capitol Beat Reporters mipildi sa mga tigbalita nga nag-cover sa City Hall samtang sa second game midaug ang mga reporters sa PNP batok sa mga nadestino sa Mandaue, Lapu-lapu, Talisay ug Regional Offices.
Balik kita sa NBAC. Amo pang gihan-ay ni Sir Bobby ug sa Board of Directors ang umaabot opening sunod buwan sa duwang basketball.
Gani gitun-an karon ang pag-usab sa mga lagda aron daghan na ang qualified nga makaduwa sama sa mga drivers nga ang trabaho exclusive for news gatherings, mga news personnel nga involve sa news online sa mga local print media, mga news editors gawas sa mga news reporters, anchormen, commentators, columnists, cameramen, photographers ug ubang direktang involved sa news organizations.
Usa sa mga plano karon sa GMA-7 Cebu bungkagon na ug duha teams ang among grupo nga mao ang “Balitang Bisdak Team” ug “Buena Mano Balita Team”.