Karong semanaha, gitaho ang kamatayon sa Americana nga komedyante nga si Joan Rivers ug ingon man ang ikaduhang pagkamabdos sa Duchess of Cambridge. Kining duha may kalabutan sa fashion world. Si Rivers tungod sa iyang programa nga Fashion Police diin iyang sawayon ang mga way angay sa ilang gisul-ob sa mga gi-ingong red carpet events. Ug ang duchess nga si Catherine kanunay nga gisunod ang iyang panamit isip maanyag nga umaabot nga rayna sa Englatera.
Karong semanaha, samtang nangandam ang Scotland sa usa ka referendum nga mopa buwag kanila gikan sa Englatera o UK, gapadayon pagpakig gubat ang mga pro Russian rebels sa sidlakang bahin sa Ukraine para usab sila mabuwag sa gobyerno ug nasud nga wan-a nila mahi-uyoni.
Duna karoy ceasefire nga gipatuman didto pero bisan pa man niani nagpadayon gihapon ang panagsinukli-ay og bala tali sa mga rebelde ug sa mga sundaw sa gobyerno. Murag trending karon ang devolution ug decentralization sa mga nasud nga ubos sa mas dagkong gobyerno.
Kabahin sa Scotland, daghang mga rock stars nga nangampanya nga magpabilin kining maong nasud ubos sa UK. Ang rayna hinuon sa England nga si Elizabeth gikatahong neutral ning maong issue.
Karon sang semanaha mihudlat ug bawos ang Russia sa gi-ingong mga sanction nga gipahamtang kaniya sa mga nasud sa kasadpan nga sakop sa NATO.
Matud pa ni Russian Prime Minister Dmitry Medvedev dili na nila paagion sa ilang kahanginan ang mga abyon sa mga nasud nga miapil paglisud-lisud kanila.
Ang mahitabo niani matud pa sa ilang prime minister nga mogamit na og mas layo nga ruta ang mga eroplano ug tungod niani mosaka na ang presyo sa plitihan og daghang mga airline ang magkalisud og mapurdoy.
Dili lang Russia maoy problema karon sa mga gobyerno sa kasadpan kay anaa usab ang ISIS sa tungang silanganan (middle east). Karong semanaha, may taho nga may nabihag ang mga sundawo sa Iraq nga usa ka Insik nga sakop sa ISIS.
Daw lain na usab kini nga pruweba nga naglakip na sa tibuok kalibutan ang impluwensya sa ISIS.
Sa pagpunay kog basa kabahin sa kagubot sa kalibutan kanunay nga mosulod sa akong hunahuna ang mga gipamulong sa siaw nga Joan Rivers kabahin sa kinabuhi: “Life is very tough and if you can make a joke to make something easier and funny, do it. And maybe you take the worst thing in the world and make it funny; it’s a vacation for a minute from horror.”