Gawas nga bangis sa mga dili maka sukol kanila, ang laing kinaiya sa Islamic State of Iraq and Syria o ISIS mao nga showbiz kaayo silag orientation. That’s right, showbiz na showbiz.
Ang quality ug ang visual narrative sa mga documentation sa ilang mga suicide bombers motupong sa mga pelikulang Hollywood sama sa Hurt Locker.
Kinahanglan gyud nila kuha-ag video ang ilang mass executions ug isibya sa YouTube. Lakip sa lain nilang hinanggaw mao ang pagpakupot sa mga bata sa mga naputol nga ulo sa ilang mga bihag ug ingon man ang paglansang sa krus sa mga patay na nga lawas.
Suma sa akong nasayran, gimugna ang kamatayon sa krus tungod kay kini mao ang pinaka-sakit ug pinaka-makauuwaw nga kamatayon tungod kay inanay kini ug makit-an kinis tanang mangagi. Apan ang mga berdugo sa ISIS mopatay una sa ilang bihag una nila kini ihigut o ilansang sa krus.
Ngano man? Ang tubag –showbiz! Daw buot silang mohimo og visual threat sa mga Kristianos pinaagi sa pag-banhaw sa usa ka iconic nga execution process… Daw naghimo silag scary movie.
Possible sad hinuon nga wa makasabot ang ISIS sa historical logic sa crucifixion.
Hinuon ang tanang matang sa public execution duna may sense of drama and pageantry. Usa kini sa mga hinungdan nga nagpadayon ang maong pundok sa paglunggo sa mga li-og sa ilang mga western hostages.
Unang gilongo-an mao ang usa ka American journalist nga si James Foley.
Ang ikaduhang gi-putlag li-og mao ang laing American journalist nga si Steven Sotloff.
Ang ikatulo mao si David Haines, usa ka British aid worker.
Silang tulo didto mabihag sa Syria. Silang tulo gilunggo-an sa sakop sa ISIS nga gataptap og itom ug gasul-ob sad og itom nga dunay British accent. Sa di pa mopatay kanila ang berdugo mohulga ug mopahimangno kini sa mga pangulo sa mga nasud sa kasadpan sama ni Obama sa US ug Cameron sa UK.
Nakahibaw gyud ang ISIS nga dili mo-atras kining maong mga nasud pag-gukod kanila apan ila gihapong gipadayon ang pamutol og liog.
Kon mangutana kag ngano, ang tubag niani –Drama. Dili makatupong sa impact sa public imagination ang mga minilyong gasto sa hinagiban sa US kon itandi sa drama sa pagputol sa ulo sa usa ka individual.
Cinematic gihapon ang treatment ning maong execution. Ga orange ang biktima, blue skies ang background ug ga itom ang berdugo nga gadag dakong kutsilyo.
May taho nga dili lang usa kabuok Briton ang berdugo sa ISIS. Usa kini sila ka pundok nga gituohang taga London. Ug giangaan kini sila sa ilang mga bihag ug dinakpan og –“The Beatles.”
“Obladi, oblada, Life goes on blah!”