Hapit nako makonbinse nga si Capitol Chief Security Officer Loy Madrigal maoy nag-drive sa sakyanan sa Kapitolyo nga nakabag-id sa gi-angkasan nga motor sa magtiayon nga miresulta sa kamatayon sa bana didto sa dakbayan sa Bogo niadtong Domingo sa gabii.
Kini human nasubay kagahapon ni Governor Junjun Davide nga ang gipa-angkon nga driver nga si Alberto Naraja dili gyud trabahante sa Kapitolyo.
Buot ipasabot, dili puwedeng maka-drive si Naraja sa government vehicle.
Segun sa mga tinubdan sa Kapitolyo nga daghang naka-kita ni Loy nga mao gyu’y nag-drive pagka-hitabo kay gani gipa-ubos pa ni Loy ang bildo nga pultahan sa sakyanan human sa insidente.
Pa-imbistigahan na sab si Loy ni Governor Davide kang Provincial Administrator Atty. Mark Tolentino
nganong nagpa-uban ug nagpa-drive kini ug dili mga organic member ug dili kawani sa Kapitolyo.
Kinahanglang imbistigahon sab ni Cebu Provincial Police Director Noel Gillamac ang mga pulis sa Bogo kay nganong napakyas pag-impound sa sakyanan ug wa gibalhug ang driver human sa nahitabo.
Kanus-a man nahimong huwes ang mga pulis nga mihimo ug out of court settlement?
Ayaw kog ingna nga anaa sa insaktong panghuna-huna ang magtiayong biktima niadtong tungura nga sila si anhing Felix Mirambel ug Marites Mirambel ug mga kabanay nga makig-areglo dayon?
Nagduda ko nga mi-abuso sa gahom si Madrigal ngan nga sinaligan lagi ni Governor Davide.
Mas maayo sab tingaling subayon ni Gov Junjun kung wa ba siya gibaligya kanunay ni Madrigal sa mga kwestiyonableng transaksyon sukad nasulod kini sa Kapitolyo.
* * *
Ang tarong ug maayong leader sa opisina dili motalikod sa problema sa iyang mga sakop bisan sa mga marital problems.
Magpakabana gyud ang mga amo sa pagsulbad ilabina kung apektado na ang relasyon sa magtiayon kay ang problematic nga trabahante dili productive sa iyang trabaho.
Mao nga sayop gyud nang moingon ang boss nga dili dalhon ang problema sa bay sa opisina.
Sa kaso ni Capitol Security Chief Loy Madrigal nga wa gyud siya manumbaling sa reklamo sa bana bahin sa iyang asawa nga secretary ni Loy nga wa nay panahon nila, butang kini nga angay’ng tubagon ni Loy sa formal investigation ilabina nga gobyerno ilang opisina.
Kung way interest si Loy sa asawa ug atong sakyan ang iyang depensa nga wa gyud silay relasyon, nganong wa man niya pugngi ang asawa nga mobiya sa gipuy-an sa iyang bana ug gidala ang mga anak?
Ang tarong nga amo mo-assert siya sa iyang moral ascendancy nga dili gyud magusbat ang pagpuyo sa managtiayon.
Ang nahitabo mitabang pa pagpalayo sa pamilya pinaagi sa paggamit sa mga escort ni Madrigal.
Porbida ni Loy nga naproblema sa iyang kaminyoon unya miguba pa gyud ug laing pamilya.
Nganong adto man gyud makig-relasyon sa dunay pamilya nga anaa may daghang way kabilinggan?
Akong nahibaw-an nga ang Capitol Committee on Discipline and Investigation (CODI) mo-convene na sunod semana alang sa motu prupio investigation.
Posible nga ilang imbitahon ang bana sa secretary nga maoy himoong nominal complainant aron dili sila maglisud ug pruyba.
Kung seryoso gyud si Gov sa kampanya batok sa mga illicit affairs kinahanglang way exempted iyang mga paryente ug mga suod nga higala nga nanaglingkod karon sa Kapitolyo.
Kining bisyo sa babaye mao gyuy sinugdanan sa corruption!
* * *
Madayon na gyud ang Sangguniang Kabataan elections karong February 21, 2015.
Subay niini, karong Sabado magsugod na ang taga Commission on Elections (COMELEC) pagpanawat sa rehistro niadtong mga kuwalipikado nga makabotar.
Pero mangambot lang ko kung mawala na ba unya ang grabeng pinalitay sa mga botante nga mas dagku pa sa palit sa Barangay elections.