Nabasahan nako sa column ni Super Bobby Nalzaro nga tulo man diay ka banggiitang taga media nga nipanaw na ang taga Argao.
Tungod niini, gi-atol sa Press Freedom Week ang pagpahingan sa tulo ka dalan sa ilang lungsod ubos sa ilang ngalan. Ang mga dalan gipahinungod nila ni anhing Press Secretary Cerge Remonde ug mga anhing manunulat Clod Bajenting ug Wilfredo “Boy” Veloso.
Malipayon kita kay wala ra kalimti sa ilang lungsod ang ilang mga trabaho isip sakop sa media. Ang mayor karon sa Argao nga si Edcel Galleos miduyog ning maong kalihukan.
Speaking of threes, ikatulo na nga higayon nga nakuha sa pamantalaang The Freeman ang Miss Press Freedom. Nakuha kini alang sa pamantalaan niadtong 2012 ni Grace Lacamiento. Last year gidaug usab kini ni Jessa Chrisna Marie Agua. Ug karong tuiga gidaug kini para sa The Freeman ni Jean Marvette Demecillo.
“Grandslam,” matud pa ni Agua. Murag naa gyud tingali ang tanang gwapa sa media magtapok sa The Freeman da. O, kamo diha, ayaw mog kagut sa ngipon ha.
Walay grandslam ay nga nahitabo sa bahin sa Mr. Press Freedom. Nakuha kini sa CDN pagka 2012 ug sa SunStar Daily last year. Karong tuiga, gidaug kini sa KBP nga girepresentaran ni King Perez nga taga TV5.
Kon mamatngonan ninyo giatol sa semana sa pagdeklarar ni Marcos og martial law ang pagsaulog sa Press Freedom Week. Daku og natabang ang media pagpalagpot ni Marcos. Ug ang pagsaulog sa press freedom usa ka pagpahinumdom nga kanunay kitang magpakabana sa atong kagawasan.
Usa sa mga gituki ni Super Bob sa iyang lindug mao kon duna ba gyuy kagawasan ang prensa.
Nagkanayon ang broadcaster ug manunulat nga tungod kay negosyo man usab ang media, dili malikayan nga ma impluwensyahan kini sa mga sponsors ug advertisers.
Matud pa usab ni Nalzaro, daghan nang mitukod og media outlet para pag pangandam sa politika ug sa pag promote og religion.
Makahinumdom ko sa ISIS nga maayo kaayo mogamit sa social media para pag dani og mga recruits sa ilang caliphate.
Karong tuiga, murag wa ko madani pag intra sa parade kay nagpatigbabaw ang akong tapol.