Kinsa may mabasol ug manubag niadtong sumbagay sa duha ka mga estudyante sa grade 3 didto sa Bantayan nga miresulta sa kamatayon sa 9 anyos?
Nagsugod sa bullying ang insidente dihang gisungog ang napatay nga bata sa iyang classmate. Kining bullying uso kaayo karon sa lain-laing mga tunghaan ma-private o ma-public.
Pero ambot kung mo-uyon ba kamo nga kining pagka-sungogan ug pagka-bugal-bugalon sa bata tipik ug kabahin sa iyang pagtubo? Kinsa man gud nato ang wa mo-agi sa pagkasungogan.
Sa ako-a lang kaniadtu manungog ko sa isig ka bata nga dili pikon. Unya sungog nga dili sab pasobra-an ug kutob ra sa estorya. Apan karon lahi na kay ang mga bata gawas nga sakit nang mang-estorya pakapinan pa ug physical contact.
Disiplina gyud ang importante. Epektibo ba ang pag-disiplina pinaagi sa maymay lang? O mas epektibo ang pag-disiplina sa mga bata pinaagi sa pagpasakit?
Ang mga ginikanan nga modisiplina pinaagi sa pagpasakit puwede’ng kasohan ug kasong child abuse o RA 7610.
Unya karon ang mga magtutudlo mahadlok modisiplina pinaagi sa pagpasakit kay gidili ang corporal punishment.
Panahon na nga tutukan kini sa mga ginikanan ug sa mga magtutudlo kung unsa-on pagpahamtang sa mas epektibong paagi.
* * *
Ambot nganong hangtud karon inutil gihapon ang Aquino administration ug ang kapolisan pagpangita ug pagdakop kang PBMA supreme master Ruben Ecleo Jr. nga dugay nang fugitive human siya nakonbikto sa kasong parricide pagpatay sa iyang asawa nga si anhing Alona Bacolod Ecleo.
Nagkinahanglan pa nga pun-an ang 2 million pesos nga reward money nga gitanyag sa Malacañang niadtong makadakop kang Ecleo?
Siyaro pud oi, nga unta pagkadaghan sa atong mga intelligence officers ug mga tinugyanan sa balaud apan wa gyud sila kadakop ni Ecleo. Basig magpadugang sa pusta ang atong mga tinugyanan sa balaud aron daku-daku ilang bahinon.
Alang nako wa nay katarungan nga tagdon pa sa korte kung moduso pa ang kampo ni Ecleo ug ikatulong motion for reconsideration sa iyang conviction human gibasura sa Court of Appeals Cebu station ang iyang 2nd motion for reconsideration.
Ang wa pagtunga ni Ecleo niadtong hinapos nga bahin sa husay sa iyang kaso ug wa mopakita sa promulgation tipik ug kabahin kadto sa ilang strategy nga di gyud siya magpadugta sa prisohan.
Dili mopagawas ug kamanduan ang PNP leadership ug shoot-to-kil order alang ni Ecleo?
* * *
Baga sab kaayog nawong si Presidente Noynoy Aquino nga wa mopakgang sa ubang mga pundok ug iyang mga kaalyado sa Liberal Party nga nanawagan kaniya nga lugwayan iyang termino.
Sa migawas nga survey sa Pulse Asia nga unom sa napulo ka mga Pinoy nga supak sa iyang 2nd term sa 2016 presidential election, dili pa gyud igong sukaranan sa presidente nga nakuha na niya ang pulso sa iyang mga “bossing” nga iyang gipaminaw?
Nganong magpanukos-nukos pa man si Pnoy?
Dili kaha Malacañang-funded ang paid advertisement nga nanawagan sa presidente alang sa iyang term extension? Dili kaha dummy lang ang mga Echiverri?
Tan-awa ra, miingon si presidential spokesman Edwin Lacierda nga di na sila mokomento kabahin sa nanggawas nga paid advertisement ug padayon silang naminaw sa sentimento sa katawhan bahin sa isyu sa Charter Change aron pagwagtang sa term limit sa presidente.
* * *
Daku gyud ning problema nga giatubang karon sa gobyerno nga mihulga karon ang mga bandidong Muslim nga Abu Sayyaf nga ilang lunggoan sa ulo ang usa sa duha ka German nationals nga ubos karon sa ilang kostodiya kung dili mobayad ang kagamhanan sa gibungat nilang 250 milyones pesos nga ransom.
Mihulga ang Abu Sayyaf Group nga karong October 17 ang execution sa langyaw.
Si AFP Spokesman Harold Cabunoc miklaro nga dili gyud makig-negotiate ang gobyerno ug padayon ilang suporta sa PNP ug sa Crisis Management Committee nga maoy naghawid sa problema.
Alang naku dili sulbad dinhi ang negosasyon. Ang maka-undang niining maong problema mao nga tinud-on sa atong armadong kusog ang pakig-gubat sa mga Abu Sayyaf.